Lawngtlaiah ran khuahkhirhna thupek bawhzuiin Animal Control Committee member-te'n nimin khan khawlai an fang.
Buh leh bal leh huan thlai bakah, mihring leh ran vulh dangte him nan te, khawtlang a lo fai a, a lo thianghlim theih nan Lawngtlai District Magistrate chuan Lawngtlai District chhunga ran khuahkhirhna thupek a chhuah bawhzui nih dan leh mipuiin an zawm that leh that loh endikin nimin khan Lawngtlai District Level Committee on Animal Control member-te chuan Lawngtlai khawpui chhung an fang kual.
Committee member-te hi Sub-Deputy Commissioner Pu K. Lalhlimpuia, chuan hovin, khawlaia khuahkhirh lohva ui chhuak an hmuhte chu manin, a neitute hnenah khuahkhirh lohva chhuahtir tawh lo turin an hrilh a. VC leh YLA te pawh mahni veng chhunga ran khuahkhirh chu khauh leh zual zawka kalpui turin an ngen a ni.
Lawngtlai District Magistrate-in thupek a chhuahah thlun lohva khawlaia ui chhuah leh vawk leh ar vulh khung lohva chhuah te, sial, bawng leh kel te enkawltu awm lova khawlai leh ramhnuaia tlattir leh ram dang leh district dang atanga Lawngtlai District chhunga ran lak luh te a khap a. He thupek hi sawrkar leh khawtlang thuneitu leh tlawmngai pawlte nen tang tlanga khauh zawka bawhzui tura rel a nih angin, a tum khat nan nimin khan member-te hian khawpui an fang kual a. Hei hi a khat tawka chhunzawm zel tum a ni.