Nimin khan Lawngtlai CMO Conference Hall-ah Lawngtlai Main Centre hnuaia Health Worker leh ASHA te tan Mizoram State Health Care Scheme (MSHCS) hnuaia inziah luh dan tur inzirtirna 'enrollment training' buatsaih a ni.
He training hi Senior Medical Officer Dr S. Thaizi chuan kaihruaiin, mipuite'n Mizoram State Health Care Scheme hnuaia hamthatna hrang hrang an dawn theihte a sawi fiah a. Mipuite'n hamthatna hi an dawn theuh theih nan khaw tin Sub-Centre-a Health Worker-te leh ASHA-te chu nasa zawka hma la turin a chah a ni.
MSHCS-a Medical Officer Dr K. Vanduhtlinga chuan kal khawmte chu Health Care Scheme-a inziah luh chungchanga hriat tur pawimawhte a hrilh fiah a. BPL chhungkaw tan Rs 100/- leh APL chhungkaw tan Rs 1,000/- pea enrollment tih a ngaih thu sawiin, he Scheme hnuaiah hian natna tih bik awm lo va, natna zawng zawng deuhthaw enkawl theih a nih thu leh damdawi in atanga an chhuah tawh hnua reimbursement-a dil let (bill) a ngaih thu a sawi a. Lawngtlai District mipuite chu a tam thei ang berin enrollment ti turin a sawm nghal a ni.