Lawngtlai West MLA hian hetiang hian a thuchhuah a siam ah a tarlang a, MNF sorkar hnuaiah Mizoram police-ten zah an kai tawk lo a, tunhnaiah ringawt pawh Assam Rifle lamin vawi engemawzat Mizoram Police te hmalakna an palzut a, a pawi ka ti hle a n
MNF sorkar hnuaiah Assam Rifle an inluling hle; Mizoram Police-te zahawmna humhim turin sorkarin hma la rawh se, tiin Lawngtlai West bialtu MLA Pu C.Ngunlianchunga chuan nimin khan thuchhuah a siam.
September 10, 2020 zan dar 11:00 khan Mizoram Police, Sangau post a awmten Indo-Myanmar Border Archhuangkai-ah dan lo a Mizoram a phurh luh Kuhva rah bag 550 an man a. Dan ang taka man a nih angin, Court a thehluh tur seizure list pawh fel taka siam vek a ni. Hetih lai hian heng Kuhva Rah te hi Siachangkawn-ah 17th Battalion Assam Rifle duty te’n zing dar 1:00 velah lo man nawn lehin, Mizoram Police hnen atangin an chhuhsak a.
Lawngtlai SDPO-in Bualpui OC a tir phei chungin Assam Rifle lam nen an inbe rem thei lo a, Mizoram Police lam hi an inthiar fihlim ta zawk a, kuhva rahte pawh AR lam hian Lungleiah an phur phei ta a ni. He Kuhva rah hi Assam Rifle man angin chanchintharah puanzar a ni zui ta nghe nghe.
MNF sorkar hnuaiah Assam Rifle an inluling nasa hle a, Mizoram Police-te leh Mizo mipuite zah lo taka min palzut fo hi a pawi ka ti hle a. Archhuangkai leh Siachangkawn a hetianga thil a thlen hma hian Vairengte-a COVID-19 testing Check Gate-ah Mizoram Police-te palzutin an lo tlan tlang lui tawh a, Zokhawthar lamah Mizo sumdawngte bungrua vawi tam tak man sakin, an lo buai phah tawh bawk. Tin, Mizoram ralmuan zia hre reng chungin rambuai ang maiin an duhna apiangah motor kal lai ti dingin, thlabarin mipui an siam fo bawk a ni.
Assam Rifle-ten MNF sorkar an ngam em em mai hi a mak hle a, sorkarin Mizoram Police leh mipui thlavang a hauh nat ngam loh vangah ka ngai a. MNF sorkar hnuaiah, Mizoram Police-te zahawmna nasa taka a tlahniam ta hi a pawi ka ti takzet a ni.
Assam Rifle-te hian Mizoram hi rambuai a ni tawh lo tih hria sela, India rama state ralmuang bera awm an ni tih inhre reng se, tualchhunga dan kengkawhtu Mizoram Police-te nek lovin, zah takin thawhpui tawh zawk rawh se. Tin, Mizoram mipuite hi India rama dan zawm tha ber, thuawih ber kan ni tih hriain zah takin min en sela, rambuai kan ni tawh lo a, kum 1986-ah inremna ziah a ni tawh tih hre reng rawh se.