Tunhnai mai ah 71 RCC Camp, inkhunghranna hmun a awmte atangin Hripui kai mi palai hmuhchhuah a ni a, heihian Lawngtlai khawpui chhung a nghawr nghing nghal dawt a, mipui chiaina pawh a nasa viauin a hriat a, mitamtakin Positive hmuhchhuah a nih hnu hian, tase, tih hmanga zeldin chhovin, social media lam ah pawh fimkhur a ngaih zia hmuhtur a awm nual a, ngaihtuahna thuitak seng lem lova, an hmunhma endik mai duh, mipangngai tak atang pawn hriattur a awm.
Quarantine Centre te hi Sorkar in khauhtaka a enkawl a ni a, a hlauhthawnawm loh a, heivang hian, hrikai hmuhchhuah te hi khunghranlai an ni tih hriat a nih rual hian, mipui lam tan chiaina tur a awm lem lo. Hetihrual hian, khawilai ah emaw tlem a lo enkawl fimkhurloh deuh leh inthlahdahna deuh awm thei ve reng a nih vangin, Central YLA leh helai camp hnaivai VLTF te chuan hma an la nghal hi a lawmawmin, a thlamuanthlak takzet a ni.
A nihnatak ah chuan, Quarantine Centre a awmlaite hi chu hri laka fihlimlo anga ngaih theih an ni a, an kai a ni tih finfiah hma pawn an hlauhawm dan a ngai reng a, Inkhunghranna hmun te hi mipui tan a him tawk tur a ni a, fimkhurloh vang a khunghranlai atanga pawnlam miten hri an kai a nih chuan, Sorkar hmalakna hi mipuiin an ring zolo anga, a aia tha a hmalakna awm silovin kan buai nuai ang tih a hlauhthawnawm thei a, engpawhnise, hri do hi tute emaw tihtur bik nilovin, kan vaia tanrualna atang chauhva hneh theih a ni tih hi hrenawn ila, kan tihtur theuh kan tih a pawimawh khawp mai.