Vawiin Dt 16.9.2020 Nilaini zing lam dar 9.00 am atanin Parliament Monsoon session ni thumna chu kan tan a.Thil pawimawh engemawzat sawi ho a ni.
Union Minister of Ayurveda and Homoeopathy Shri Shripad Yesso Naik Bill put luh The Establishment of The Institute of Teaching and Research in Ayurveda chu hun rei tak sawi ho a ni a.
Memberte kan tui tlangin State hrang hrang MP ten an state chu Medicinal plant(ramhmul damdawi ka ti mai) a an hausak thu leh an state ah ngei Institution din tul an tih thu an sawi huai huai mai a.
Nguntakin ka ngaihtuah a,keini Mizoram anga ramhmul damdawia hausa state dang an awm ka ring si lo va.Mahni insit hle mah ila thu ka sawi ve ngei a ngai a nih hi tih ka ngaihtuah a.Nimin lamah The Aircraft Bill kan sawi ho laiin ka thut hmunah bân phara thu sawi ka dilna te Chairmanin a rawn hmuh hmain midangin min sawi khalh zel kha ka hre reng a.Tihdan dang ngaihtuah a ngai a nih hi tiin ka kianga duty pakhat hnenah chuan Chairman hnena pek tur lehkha them ka ziak ta ngawt a.
Ka beisei ang ngeiin Dar 11.00 am ah Chairman Pu M.Venkaiah Naidu chuan ka hming lamin thusawi turin min rawn ko ta nalh mai a,ka lawm ngei mai.
Sap tawng ka thiam loh zia hre reng mah ila he hun hlu tak hi bawlhpelh hlau takin thu ka sawi ve ta.
Mizoram 50% chu Forest a nih thute,forest ah ramhmul damdawi awmsa tamtak kan neih thute ka sawi a.Chuvangin hetiang ramhmul damdawi lam zirchianna institution Mizorama din turin Central sawrkar leh a changtu Minister ka ngen thu ka sawi a.Chubakah Medicinal plant hmanga damdawi siamchhuahna tur micro and Small insustry Mizorama din tura ka ngenna thu ka sawi chhuak a ni.
Saptawng lamah duh thute kan sâm lo nain ka duhzawng chu ka târlang ve thoin ka hria a.MP ka nih atanga Session hmasa berah,ni thum kan thutkhawmnaah thusawina hun tha tak mai ka chang hi ka lawm hle a,Pathian malsawmna hlu tak ka dawng tih ka hria a,ka lawm khawp mai.