Lawngtlai leh Siaha DC tang kawp buatsaihin Kolodyne Music Festival 2020 (KMF-2020) chu a tum khat nan Kawlchaw khaw bula Chhimtuipui (Kolodyne) lui kamah Zirtawpni leh Inrinni khan buatsaih a ni.
Zirtawpni chawhnu lama he Festival hawnna hunah Lawngtlai DC Pi Shashanka Ala, chuan Festival hlawhtling tak buatsaih a nih theih nana hma latu Organising Board member te, sum leh paia tanpuitu te, zai thiam leh hnam lam entirtute, Kawlchaw khawtlang leh mipui pung khawm zawng zawng chungah lawm thu a sawi a. Festival chu Chhimtuipui area-a mite a tha zawnga suih khawma ke pentirtu atana buatsaih a nih thu sawiin, Festival thupui pathum - bawlhhlawh siam lo zawnga khawsak zir tur te, ruihhlo laka inthiar fihlim tur leh plastic lam chi hmang tam lo tur te'n kal khawmte chu a chah a ni.
Siaha DC Pu Bhupesh Chaudhary, pawhin thu sawiin, a tira an suangtuahnaa mi tuna a taka hmuh theih a lo ni ta leh mipuiin an hlutpui chu lawmawm a tih thu sawiin, an buatsaih chhan a hlawhtlin ngei a beisei thu a sawi a. Mipuite chu hlim taka hun hman chhunzawm turin duhsakna a hlan.
Kolodyne Music Festival hi district pahnih - Siaha leh Lawngtlai mipuite tana buatsaih niin, Organising Board-ah pawh district pahnih atangin ai indah ve ve a ni . Sawrkar department, LADC, MADC leh mimal sumdawng atang te'n sponsorship hmuh niin, Mizoram pum huapa zaithiam lar - bakah, tualchhung zaithiam te inlanin, Siaha Meisavaih 'W' Branch MTP leh Lawngtlai College Veng Branch YLA te'n hnam lam an entir bawk.
Tags
News