Bungtlang South tlangval ruang Nghalimlui bul ah hmuh a ni

Tun thla January ni 4 atanga Nghalimlui atanga a awmna chin hriat lohva bo,  Bungtlang South khaw tlangval Lalrawnliana ruang chu Inrinni khan, Nghalimlui khaw bulah hmuh a ni a, Bungtlang South khawtlang hruaitute chuan mi kut tuara thi a nih ngei an ring tih an sawi.

 January 3 Zirtawpni khan Lalrawnliana, Pu A. Lalhmuaka fapa hi Nghalimlui khuaa Lungphunna ah telin, hemi zan hian zanrei lam ah, khaw thenawm Vaseikai ah a thian pakhat nen an kal a, hemi hnu hian a awmna chin hi hriatzui a ni ta lo a ni.

Bungtlang South khawtlang hruaituten an sawi danin, ni engemawzat chu Nghalimlui leh a chhehvel khua ten ngawrh takin an zawng zui a, an Veng Bungtlang South-II atang pawhin mi tlawmngai thahnem tak an thawk chhuak a, nimin Inrinni khan ruang hi Nghalimlui leh Vaseikai khaw inkar a Airtel Tower bul a Luite kamah hnahchhawl vel a a ruang inkhuh chu hmuh a ni ta a ni.

Inrinni vek khan ruang hi Bungtlang South panpui nghal a ni a, nimin khan  Bungtlang South PHC ah Post Mortem a nih hnu ah vuiliam a ni. Vasei Police Station ah thubuai ziahluh  niin, Police te chuan thil thlen dan chhuizui nghalin, thu zawhfiah turin hemi zan a a thian kawm pakhat chu an kawl mek.