Mizoram Governor Pu PS Sreedharan Pillai chuan nimin khan Chakma Autonomous District Council (CADC) hmunpui, Chawngte a tlawh.Governor hian zing dar 11:15-ah helicopter-in Chawngte an thleng a. CADC Rest House tuala amah lawmna inkhawm buatsaihah Governor chuan India rama hmun kilkhawr berte zinga mi CADC tlawh theia a awm chu lawmawm a tih thu a sawi a. India mi tawh phawt chuan ram Danpui hnuaiah dikna chanvo inang tlang vek kan nei a, hmun kilkhawr bera mi pawhin khawpuia mite ang bawkin hriselna, zirna, inkal pawhna leh inbiak pawhna tha kan phu vek a ni, a ti a. Hma sawnna kawnga CADC huam chhung an la hnufual bik hle chu pawi a tih thu sawiin, political party hrang hrangte chu pawl bik sawi lova lung rual taka an thawh ho phawt chuan hmun hnufual ni reng bik lovin, hma sawnna nasa tak a thleng thei dawn tih hriaa tum thuhmun neia thawk turin a chah.
CADC Chief Executive Member (CEM) Pu Rasik Mohan Chakma chuan inlawmna thu sawiin, CADC dinhmun tlangpui a sawi a. Tuichawng bialtu MLA Dr BD Chakma pawhin thu sawiin, ADC-te'n thuneihna sang zawk an neih theih nana hma lakpui turin Larsap hi a ngen a ni.
Governor lawmna inkhawm hman zawh hian CADC Rest House-ah tlawmngai pawl leh political party hrang hrang hruaitute leh CADC lam hotute nen inkawm hona hun buatsaih a ni a. Hemi hnu hian Governor chuan Chawngte Community Health Centre a tlawh a. Chawhnu dar 2:30-ah Aizawl lam panin helicopter-in an thlawk chhuak leh nghal a ni.
Tags
News