Nimin khan Ministry of Women and Child Development hnuaia din, Lawngtlai District-a hmeichhe baihvaite tluk luh lailawkna tur 'Sakhi - One Stop Centre' chu Lawngtlai Bawrhsap Pi Shashanka Ala, chuan a hawng.
Pi Shashanka Ala chuan OSC chu hmeichhiate himna tura hma lakna lawmawm tak nia a hriat thu sawiin, Lawngtlai District-a an chunga hleilenna thleng hmeichhiate'n an hriat zau va, tluk luh nana an hman theihna tura pu darh tur leh chuti anga tanpui ngaite bengvarpui turin kal khawmte chu a chah a. Hmeichhiate himna chu khua leh tui tin mawh phurhna a nih thu a sawi.
OSC hawnna hun Lawngtlai College Venga District Project Officer office building-a hman hi Lawngtlai DPO Pi Vanlalhruaii'n kaihruaiin, OSC chanchin tlangpui a sawi .
One Stop Centre hi hleilenna chi hrang hrang tuar hmeichhiate'n vanduaina emaw, an sut kian zawh loh harsatna an tawh emawa an tluk luhna leh inhumhim lailawkna tura din a ni a. Rikrum thila tanpuina pek te, an hliam enkawlsak te, dan hnuaia an dikna chanvo an hmuh theih nana tanpui te, an rilru hahdamna tura kawm te, riahna tur leh ei tur lo buatsaihsak te an ti thei a. Thawktu mi 9 an awm a ni. Tum khata mi panga awm theihna tur niin, mi pakhat hi ni nga leh zan nga chhung an awm thei a, chumi hnua pan tur dang an hriat loh chuan hun rei zawk awm theihna home dangah an awm zui theih dan tur ngaihtuahsak thin an ni ang.
Tags
News