LADC a Nominated Member ten Sorkar bukna a Vote an neihtheih nan a High Court a an thlen chu October 18 khan Gauhati High Court, Aizawl Bench chuan a hmawrbawkfelin, Nominated Member ten Vote an nei thei dawn lova. Hetihlai hian Congress Legislature Party chhuahsantu Member panga te, chungchang chu, Gauhati High Court Division Bench chuan November 6, 2019 hian a ngaihtuah dawn.
Kum 2007, July ni 3 a Mizoram Sorkar, District Council and Minority Affairs Department in LADC Secretary ah lehkha thawnin, Sorkar fiahna ah Nominated member ten vote an thlak thei lovang tih a hriattir chu LADC a Nominated Member pathumte chuan High Court ah khingin, Vote an neihtheih nan hma an la a, hemi chungchang ah hian Gauhati High Court, Aizawl Bench chuan October 18 khan thutawp siamin, State Sorkar, District Council and Minority Affairs in lehkha a lo tihchhuah tawh chu a nemnghet a, tihian LADC a Nominated Member te chuan Sorkar bukna ah Vote an neithei dawn ta lo a ni.
Hetihlai hian LADC a Congress Legislature Party atanga chhuak Member pangate chu Member an nihna hlihsak an nihtheih nana hmalakna ah, Gauhati High Court, Aizawl Bench in, thutawp chu Governor siamtur a a dah chu, Member pangate hian Division Bench ah an thlen ve leh vangin, Governor chuan, Member panga te dinhmuntur hi a la tichiang lova, heng Member panga te chungchang hi thlaleh November 6 khian Division Bench chuan a ngaihtuah dawn a ni.
LADC ah hian Elected Member 25 awmin, Congress chuan Member 16 neiin, Congress Legislature Party chuan anmahni thlawptu Independent Member pakhat nen Member 17 neiin Sorkarna an siam a, Congress Legislature Party atangin Congress Member pali leh an mahni thlawptu Independent Member pakhat chuan CLP an thlawpna hnukdawkin, MNF Member 8 nen United Legislature Party dinin, LADC a Pu T.Zakunga kaihhruai Congress Sorkar paihthlak tumin hma an la mek.
Tags
News