Tunhnai khan Journalist ten LADC Executive Secretary an kawm na ah, Executive Secretary chuan, Budget chu bituk awmsa hnuai ah siam a nih thin thu Chanchinbumite hi a hrilh a, heihi mitamzawkin an hriatsa ni mahse, hmasawnna kawng daltu liantak niin a hriat a ni.
Tuntum chu cheng Nuai 100 kan pe dawn che u a, in hmanralna tur rawn siam teh u, tih nen a danglamna a awm in a lang lova, hetiang reng a Council hi a kalchho zel a nih chuan, hmasawnna hna thawhna tur hi a tlem tual tual emaw, ngai a awh deuh reng emaw in a awm ang tih a hlauhthawnawm a, ram hruaitute pawn sutkian a nihtheih nan tan an lak a pawimawh a, Council inenkawlna tur bak, hmasawnna hna thawhna tur atan, State sorkar in a duhsak deuh kum ah pawisa a tam a, a insum deuh kum ah a tlem deuh mai dawn niin a ngaihtheih awm e.
Council chuan hmasawnna hna thawhtur a ruahman anga, chu chu State in pawmtlak a a ngaih chuan pawisa pawh a pe mai tur a ngaihtheih a nih laiin, tuna a kalphung nen chuan hetiang ngawt hi a nih hmel loh deuh a, awmze nei zawk a LADC Budget hi kalpui a nihtheih nan hmala theituten tan a lak a tul awm e.
Tags
Editorial