Pathian lamhruainak thawng in YLA Day voi 45 nak kan hmang kho than ding hi lunglawmh awktlak a va si hringhran dah! Tutan YLA Day voi 45 nak ah hin Central YLA nih cun hmunkip le tlangkip i a ummi Laifa le YLA Member vialte, Khuazing Pathian thluachuah vanluh in hampiak hna bu in kutzatial kan in tlaih hna. YLA member a simi poah nih cun YLA hrihhram le a hramthlaknak, kan tlaihthleng le kan zulh awk a simi lam kha kan lungthin ah riak peng sehlaw, atu YLA Day voi 45 nak kan vun phanh tik ah Laifa a simi le YLA Member hna kan lungthin ah i pehtlaihnak tha le tuantinak tha kha fek chinchin in; Khrihfa ziaza tha dawhte'n nungin kan Lai miphun sinak le kokek nunning kha hlam than in hlorh chinchin a si khawh naklai teirialnak he tuan peng hna usih mu.Tukum 2019 YLA Day voi 45 ah “Thianghlimnak le Environment Protection” cu kan tlangtaar a si bantuk in Branch kip nih kanmah le phak tawk cio in YLA Day 2019 tlangtaar he pehtlaiin rian kan rak tuanmi thawngpang tete hna kan vun theih tik ah kan i lawm taktak! Atu thok in YLA Member le lungthin ah hi kan YLA Day biatlangtaar hi riak peng sehlaw, kan pawngkam thil ummi hna humhak le runven kong ah le i thianhhlimhnak kong zong ah atu nak in hmailei ah kan ?hanchoh chinchin khawh nakhnga YLA DAY 2019 nih hin Branch kip ah theipar tha chuahter sehlaw, tutan biatlangtaar hi kan lungthin cio ah hmun camcin ko seh.
YLA Day voi 45 nak kan vun phanh tik ah mual an kan liamtak cangmi - Tleicia kan hruaitu vialte hna le harnak phunkip le hling le so kar ah YLA ca i zaanghlei rak cawitu - Kan Central YLA hruaitu hmasa hna le Branch kip hruaitu a rak simi vialte hna, hmaizah upat he nan kut kan in tlaih hna i, nan tuanmi theipar cu nihinni ah hin kannih chanthar hna nih cun kan zuun cuahmah i, kan lung ai lawm tuk hringhran!
YLA Day voi 45 ah hin kan Ram le Miphun caah, har ko hmanhseh hmailei panh i kar hlang chinchin ding in kan in sawm hna.
LAIRAM LE LAIMI CAAH YLA NI BANG TLANG ZUNGZAL KO SEH
Tags
Article