Raltlan thawnlet zing ah Mizoram a rawnlet an awm hriat a nilo.

         Kum 2017 atanga Myanmar Army leh Arakan Army te inbeihna vanga, an sahmina zawng a Mizoram a rawn tlanlut, Lawngtlai District chhimthlang lam, Hmawngbu chhuah leh a chhehvel a inbengbel zui te, kumin July 2 a Sorkar laipui ruahmanna anga Myanmar a thawnlet te chu, tun thlengin Mizoram ah rawn let an awm lo tih, helai hmun a khawtlang hruaitute chuan an sawi.

           Heng raltlante hi Zakhai hnam niin, Hmawngbuchhuah khua ah inbengbelzuiin, an ram chu an tan himlo ni a an sawi vang leh, an ramah an damkhawchhuah nan hnathawhtur a awmlo ni a sawiin, engemawchen chu Mizoram chhung ah hian an awmzui a, kumin July ni 2 khan an ram lam ah thawnlet niin, an chenna In 54 pawh Magistrate hriatpuina in luahzuitlak lohvin tihchhiat zui a ni.

          Hetihlai hian, raltlan thawnlet zing ah chhungkua engemawzat chu Mizoram ah an rawnlet leh ang a thuthang awm chungchang ah, The Lawngtlai Post in,  helai a khawtlang hruaitute a kawmna ah, raltlan thawnlet zing ah Mizoram a rawn let an awmloh thu an sawi a, hetihlai hian In sawm vel chu Mizoram chhung a thlawhma nei lai te chuan an thlawhma chu an enkawlzui tih an sawi a, Mizoram chhung a khua behchhan bik emaw nei a rawn let an awm an hriatloh thu an sawi.

       

Khawtlang hruaituten an sawidanin, ramri boruak a ralmuang a, thilduhawmlo thleng hriattur a awm lova, Myanmar ramri dep, Laitlang a Assam Rifle awm te pawh Dumzautlang ah an insawn a, ramri ven hna erawh an thawk ngawrh viau niin an sawi.