NGO Co.Ordination Committee, Lawngtlai District chuan vawiin khan LADC Inthlanpui neiha Candidate te kokhawmin, LADC ah rorelna dik leh zahawm, tlo leh rintlak a awm an duh thu an hrilh.
Central YLA Office a, YLA Golden Jubilee Hall a hun an hman ah hian NGO Co Ordination Committee Chairman, Pu F.Lalrothanga, Central YLA President chuan December 9 ah Inthlanna a Vote tlate chhiar a ni dawn a, reilote ah Sorkar thar a piang dawn a, Party mala Sorkar emaw Thawhdunna leh Thawhhona atanga Sorkar siam pawhnise, ram mipui ten Sorkar nghialnghet an mamawh tih sawiin, Inthlan result hriat hma, tutenge MDC tih hriat a nih hma hian Candidate ten ram leh mipui dinhmun nguntaka thlir turin a ngen.
Pu F.Lalrothanga chuan Sorkar chuan Hnam ziarang, tawng leh culture vawnhim leh hmasawnna atana hmalak chu an tih ngei tura an ngaih thu a sawi a, Sorkar a chanvo pawimawh zual, CEM, Chairman, Deputy Chairman leh Department pawimawh zual, ram leh hnam hnuk khawih nasa bik, Education, Forest, Revenue leh Art & Culture Department te chu Autonomous District Council hming putchhante enkawlna hnuaia a awm chu an duh ber a nih thu a sawi bawk.
Vawiina NGO Co Ordination Committee leh Candidate te inkawmna ah hian, Sorkar indindan emaw Sorkar kaldanah mipui mit tikham zawnga chetna a awm a nih chuan NGO Co Ordination Committee in hma an lak tur thu sawilan niin, Candidate te atangin thusawi ngaihthlak a ni bawk.
LADC Inthlanpui ah khan ZPM chuan bial awm zawng zawng bial 25 ah Candidate neiin, MNF in 20, Congress in 14, BJP in Candidate 10 neiin Independent Candidate 11 nen Candidate 80 an awm.
Tags
News