Lawngtlai District chhung, Kakichhuah ah Tuihri ni a hriat vangin mi pali an thih tawh a, Medical Team ten vawiin khan Kakichhuah an pan.
Kakichhuah hi Lawngtlai atanga chhim lam, Myanmar ramri a awm niin, Tuithumhnar MDC bialchhung a awm a ni a, Tuithumhnar bialtu MDC Pu H.Lalmuansanga chuan Kakichhuaha hrileng leh chhiatna thleng hi tukin khan Lawngtlai Bawrhsap, Pu Donny Lalruatsanga hrilhin, Bawrhsap hian rangtakin Chief Medical Officer, Dr.Lalmuanawma Jongte nen ruahmanna hmanhmawh siamin vawiin khan Medical Team, Dr.C.Lalzampuii hovin, thuamfamkim nen tirh nghal an ni.
Kakichhuah a Hrileng vang hian vawiin thleng khan mi pali an thi tawh a, November 4 khan Pu Lawmla kum 75 chu hrileng vang hian a thi a, November 9 khan Pi Neda kum 24 leh Pu Kailaw kum 48 te an thi ve leh a, tukin khan Tv Sawla kum 28 chu a thi ve leh a, hri vanga thite hi Khumi hnam ni a hriat an ni.
Kakichhuah khawtlang hruaitute chuan Hri a darh lohnan Mitthi sawngbawl leh vuina pawh mipui nawlpui a punkhawm an remti lova, mitlawmngai thlanchhuah ten an buaipui.
Dr.Lalmuanawma Jongte CMO, Lawngtlai chuan Kakichhuah a hrileng chu enfiaha, damlo te enkawl turin Medical Team an kal thu The Lawngtlai Post hrilhin, mipui te chiai lo tura chahin, Ei leh in ah fimkhur tur leh Tui chhuanso dah daih leh chauh inturte, zun leh ek thlahdah lo turin a chah a, tun dinhmun ah damlo 15 atanga 20 vel an awm mek niin a hriat a, he natna veite chuan rangtaka Damdawi lam thiamte rawn zung zung turin a chah bawk.
Kakichhuah hi In 130 vel awmna niin, Myanmar ramri dep a nih vangin Khumi raltlan engemaw zat an awmtel a, mithite hi tualchhungmi pathum leh Raltlan pakhat niin, Pum nuamlo, Kawthalo, Luak leh Khawsik te chu an natna lanchhuah dan niin an sawi.
Tags
News