Lawngtlai District chhung, Kakichhuah ah Tuihri ni a hriat leng mek vangin tukin khan Rawlthar kum 14 a thi a, hriattheih chinah Hrileng vang a thizat hi panga an tling tawh.
Kakichhuah a Hrileng vang hian Lawngtlai District Magistrate Pu Donny Lalruatsanga chuan Kakichhuah chu tlawhpawh theihloh tura kharkhipna thupek vawiin khan a chhuah a, mipui chiailo tur leh damdawi lam thiamte thurawn ngaipawimawh turin a ti.
Vawiin khan Lawngtlai Bawrhsap Pu Donny Lalruatsanga leh Chief Medical Officer Dr.Lalmuanawma Jongte te chuan Kakichhuaha Hrileng chungchang hi sawidunin, CMO chuan tun dinhmun ah he hri kai ni a hriat damlo 27 an awm thu Bawrhsap hi hrilhin, Rapid Response Team din niin an thutchilh thu leh Medical Team ten Sample an lak te pawh ZMC&H ah enfiah tura thawn a nih thu Bawrhsap hi a hrilh.
Chief Medical Officer, Dr.Lalmuanawma Jongte pawhin thuchhuah siamin, Hri hi Myanmar ram chhung, Salachhuah atanga rawnlut ni a an hriatthu leh mipui lam chu Damdawi thiamte thurawn ngaipawimawh tura a duh thu leh hri kai theihna leh darh theihna lakah mithiamte thurawn zawm tura a duh thu a tarlang.
Young Lai Association, New Kakichhuah Branch pawn thuchhuah siamin, an khua atangin zinchhuah an khap a, Damdawi lam thiam leh an harsatna buaipuitu tur nilo chu tumah an khua a lutlo turin an ti bawk.
Tags
News