Chakma Autonomous District Council ah thuneihna inchuhna kalmek karah Mizoram Governor chuan Chakma Autonomous District Council thuneihna, thlaruk chhung atan laksakin, Lawngtlai DC chu CADC enkawlturin a ti.
Chakma Autonomous District Council a BJP hruaitu, CEM Pu Molin Kumar Chakma chu June 16, 2025 khan No-Confidence Motion hmangin CEM atanga paihthlak a ni a, motion hi Zoram People’s Movement member, Rengkashya bial atanga MDC thlan tlin, Pu Doymoy Daveng Chakma chuan a pulut a, CEM Pu Molin Kumar Chakma hian sorkarna chelh chhunzawm turin member a ngah tawk tawh lova, hruaitu thlak danglam ngai a nih thu a sawi.
Session a tel Elected Member 17 zinga MDC 15 chuan motion hi an thlawp a, MDC 1 chuan motion thlawp lo zawngin a vote thung. MNF, MDC awmchhun, Pu Rasik Mohan Chakma chuan vote a thlak lo. BJP hruaitu, CEM paih duhtu an tam zawk vangin, CEM chu paihthlak a ni.
May 2023 khan CADC ah hian inthlanpui neih niin, MNF hruaitu CEM a tan Pu Rasik Mohan Chakma lakluh anih hnuah, kumin February ni 27 khan Pu BJP hruaitu, Pu Molin Kumar Chakma chuan a thlak a, CADC ah hian thlantlin member 20 awmin, Member pakhat thita ai thlan anih loh avangin tun dinhmunah Member 19 an awm mek a, ZPM in member 16 neiin, MNF member 1 leh BJP Member 2 an awm mek.
CADC ah hian ZPM chuan an hruaitu Pu Lakhan Chakma hovin Sorkarna siamtum in theihtawp chhuah mahse, Governor hian State Sorkar a biakrawn hnu ah CADC thuneihna hi a laksak ta a ni.
CADC a Politics inlumletna nasa leh hmasawnna aiin hnungtawlhna zawk a thlen belh an hlauh vangin Chakma Hnam pawl hrang hrangte chuan Governor hnen ah CADC Sorkar thiattur hian an lo ngen tawh bawk.