Vawiin khan District Information & Public Relations Office leh Mizoram Journalists' Association , Lawngtlai, tangkawp buatsaih 'Media Workshop' chu Lawngtlai Press Club ah neih a ni a. Dr. Lorrain Lalpekliana Chinzah, Adviser to Chief Minister ( H&FW, A&FW) chuan khuallian niin a hmanpui.
Dr. Lorrain Lalpekliana Chinzah chuan Chanchinthar lakkhawm leh thehdarh kawngah Lawngtlai district chu district dang aia hmasawn tak ni a ahriat thu tarlangin, hma lam hunah pawh thahnem ngai taka thawk zel turin a fuih a. MLA chuan 'New Media' avangin 'Traditional Media' hian harsatna tam tak tawk thin mah se, mipuiten Traditional Media - an la hlut hle tiin, hlut tlak leh rintlak ni tura thawhrim erawh a pawimawh tak zet a ni, a ti. Mizo tawng ziah dan dik pawimawhna sawiin Adviser to Chief Minister chuan 'social media' hman nasat vangin hawrap uluk lohna a hluar hle a ti a. Hawrawp dik tak, ziahzawm leh zawm loh tur bakah 'spelling' dik tak hmang zel tura fimkhur thar turin Chanchinthar thehdarhtute a sawm a ni.
Adviser to Chief Minister chuan zau zawka chanchin thar thehdarh turin New Media- lamah pawh hmasawnna neih a pawimawh hle a ti a. Khawvel changkannain a kentel tlat a nih angin, hmang tangkai a tul thu a sawi a. Mipuiten chanchinthar dik leh rintlak an hmuh theihna turin thuthar thehdarhtute chuan taihmak chhuah a tul hle a, a chin chhuaka chhui ngaiah pawh taima taka thawkfo thin turin a chah. MLA chuan thuthar thehdarhtute chu mipui sûkthlek khalh ngil thei ber an nihna anga mahni pawh inchhiar zau leh thil thar zir ngai awm ang angte zir thar fo thin turin a fuih a . Dr. Lorrain Lalpekliana Chinzah chuan Lawngtlai District chu Media- khawvela district hmasawn ber ni tura tan la tur leh hlawk taka 'Media Workshop' nei tura duhsakna hlanin, kalkhawmte chu sawrkar thawhpui tlat turin a sawm nghal bawk.
Vawiin 'Media Workshop' hmanna inkhawm hi hun hnihah then a hman a ni a. Chawhma lam inkhawm hi Pu Elvis Lalthangzuala, President, MJA, Lawngtlai chuan a kaihruai a. Hetah hian Pu Lalngheta Ralte, Treasurer, MJA, Lawngtlai, kaihruaiin " Traditional Media and New Media " Pu Vanneihtluanga ziak chu zirho a ni a. Pu H. Lalrinmawia, Vice President, MJA, Lawngtlai, chuan chawhnu lam inkhawm kairhuaiin, Pu Zonunchama Ralte, DIPRO, kaihhruaiin Dr. H. Laldinmawia ziak " Mizo tawng ziah dan dik " tih chu zirho a ni bawk a. Sawihona hun tha tak neih nibawkin , kalkawmten hlawkthlak an tih thu an tarlang a ni.
Media Workshop - hmanna inkhawmah hian District Information & Public Relations Office- a thawktute, Mizoram Journalist Association Lawngtlai leh Information & Public Relations Department, LADC- te an tel thei a. Pu Lalchharliana, Secretary, MJA, Lawngtlai, chuan lawmthu sawiin hun a khar.
Tags
News