LADC a CEM in Online a chhiah pekna vawiin khan a hawng.

Vawiin khan Lai Autonomous District Council a Online a chhiah pekna chu Chief Executive Member Pu C.Lalmuanthanga'n a hawng.

CEM Conference Hall a he hun hmanna hi Executive Member, IT changtu Pu Lalropuia Chinzah chuan kaihruaiin, CEM chuan  khawvel hmasawnna tangkaitaka hmanga, LADC in Online hmanga chhiah pekna a kalpui thei ta chu lawmawm a tih thu sawiin, thahnemngaitaka buaipuitu HDFC Bank leh Qfix leh LADC a thawktute chungah lawmthu a sawi.

Pi Lalhmingmawii, Area Head, HDFC Bank chuan Video Conferencing hmangin Online Tax Payment Portal chungchang leh a hmandan a sawi fiah a, Pu HK Jessy Lalthahluana, Branch Manager HDFC Bank, Lawngtlai chuan HDFC kaltlanga LADC in awlsam zawka chhiah pekna an neita chu lawmawm a tihthu sawiin, HDFC Bank chu an tangkai theihna zawnah huamzauzawk a hnathawktur pawn an inpeih reng thu a sawi.

LADC chuan chhiah lakna chi nga a nei a, vawiin a tlangzarhtak Online Tax Payment Portal ah hian a bultan nan Land Revenue & Settlement Department hnuaia Land Leased bik a huam phawt dawn a, tihlen chhoh zel tum a ni.