CADC a Village Council inthlanna buaipui hmasakngai buaipuitur ten an Duty-na tur an pan.

March 12 a Chakma Autonomous District Council a Village Council 88 a inthlanna buaipuitur ten vawiin hian an duty na tur Lawngtlai atangin an pan.

Nimin khan State Election Commission chuan Chakma Autonomous District Council a Village Council inthlanpui neihtur hi a puang a, District Election Office, Lawngtlai in ruahmanna a lo neih tawh angin inthlannatura buaipui hmasak ngai, Nomination file leh inhnukdawk duhte tana inhnuhdawh theih hun hawn leh mipuite hriattur pawimawh puanzar ngaite thawk turin Village Council 88 a Returning Officer te chuan vawiin hian an Duty na tur hmun an pankim ang.

CADC huamchhunga Village Council-a ding tur tan  February ni 19 thleng hming a pekluh theih a,   inhnukdawk duh tan February ni 24 thleng hun pek an ni. CADC hnuaia Village Council-a vote tla te hi vote thlak ni vekah chhiar fel a ni dawn a, vote thlak that ngai a awm a nih chuan vote thlak tuk March ni 13-ah neih that leh tura ruahman a ni a, March ni 17 a VC tinte inpeih fel vek tura tih an nih bakah a tuk March ni18-ah VC thlan leh a kaihhnawih pawh zo fel vek tura ruahman a ni bawk.

Returning Officer te chhuaktur hi Additional District Election Officer, Pu Zoramsiama Hmar chuan thlahliamin, tluangtaka an duty hlenturin duhsakna a hlan.

Chakma Autonomous District Council E-Roll thar berah mipa 19,162 leh hmeichhia 18,721 an vaiin mi 37,883 an awm.

CADC huamchhungah hian Village Council seat 88 ah,  General seat 428 leh Reserved seat 88 a awm a, CADC hnuaia VC seat awm zat chu a vai a belhkhawmin seat 516 a ni.

CADC huamchhunga Village Council lian ber chu Kamalanagar-I niin hetah hian voter mipa 840, hmeichhia 838,an vaiin  1678 an awm a, Vote nei tlemberna  Gobasuri niin   , voter mipa 58 leh hmeichhia 56 an vaiin 114 an awm