Tukin zing dar 7:00 khan India Republic Day vawi 76-na chu Central YLA khelmual, Lawngtlaiah lawm a ni a. Pu Cheemala Siva Gopal Reddy, Lawngtlai DC chuan Ram puanzar pawtpharhin Parade Contingent 20 ten Ram puanzar chibai an buk a chhanglet.
Pu Cheemala Siva Gopal Reddy chuan Lawngtlai District mipuite Republic Day chibai bukin, India in mahni inrelbawl hrang thei tura danpui a neih theihna tura theihtawp chhuahtute zahna chibai a bukin, India Hnam Pa Mahatma Gandhi bakah Subhash Chandra Bose, Dr. BR Ambedkar leh zalenna sualtu dangte, Mizorama zalenna sualtu- Shoorvir Pasaltha Khuangchera, Lalnu Ropuiliani leh midangte hian zah an phu hle tih hriaa, ngaihsan deuh deuh a tul hle a ti a.
DC chuan India danpuiin dikna chanvo a pek ngaihlu tur leh khua leh tui tha tak ni tura theihtawp chhuah turin Lawngtlai District mipuite a sawm a ,India ram leh khawvel pawhin ngaihhlut em em 'Tlawmngaihna' vawng nung zel tura tan la thar turin mitinin mawhphurhna an nei tih sawiin, nitin a nunpui zel turin mipuite a chah.
Khuallian chuan Mizoram Sawrkar hmalakna pawimawh tak ' Bana Kaih' chu Lawngtlai district chhunga kut hnathawktute hamthatna tura chak taka kalpui a nih thu a sawi bawk. LADC leh CADC hnuaia department hrang hrang ten mipuite hmasawnna turin hma an lak mek thu a sawi a. Sports Department - hmalaknaa '43rd Mizoram State Boxing Championship 2024' a Gold Medal -3, Silver Medal - 2 leh Bronze Medal- 4 lak a ni chu lawmawm a tih thu a sawi.
DC chuan Police, Excise leh Central YLA Drugs Reduction Squad te'n ruihhlo dona kawnga an hma lakna fakawm a tih thu a sawi a sawi bawk.
DC chuan District chhunga hmasawnna hnathawh hrang hrang a sawi a, Republic Day puala Intihsiakna a lawmman late hnen ah a hlan bawk.