Chakma Autonomous District Council (CADC) a BJP District President Pu Durjya Dhan Chakma chuan MDC 3-in an party an rawn zawm tak avangin CADC-ah sorkarna an siam theih tak thu a sawi.
Pu DD Chakma sawi danin ZPM lama awm MDC pathum - Pu Amit Bayan Chakma, Pu Sanjeep Chakma leh Pu Doymoy Daveng Chakma te chuan BJP an rawn zawm tak avangin CADC-ah BJP chuan sorkarna an siam thei ta a. Vawiin hian an MDC pakhat Minister hlui Pu Nirupam Chakma leh BJP a Mizoram bialtu Devesh Kumar te chu CADC ah BJP Sorkar a dintheihnana hmalaturin Aizawl an pan a, BJP State President te nen inrawn tlangin MDC te'n legislature party hruaitu an thlang ang a, Legislature Party Leader, Chief Executive Member tur an tihfel hnuah Governor, Dr. Hari Babu Kambhampati hnenah sorkar an siam theih thu hrilh a nih tur thu a sawi.
A tul a nih chuan BJP MDC te hian a huhovin Governor hi an hmu dawn niin Pu DD Chakma chuan a sawi a, MNF MDC awm chhun leh tun hnai a CADC CEM paihthlak tak Pu Rasik Mohan Chakma chu MNF MLA a nih bawk avangin sorkarah hian a tel ve a rem leh rem loh ngaihtuah a ngai dawn niin a sawi a. A hma hian Pu RM Chakma hian NDA anga BJP lam a thlawp leh thlawp loh tur chungchang chu MNF hruaitute thu thu a nih tur thu a lo sawi tawh bawk a ni.
CADC a politics thil inthlakthleng lo intanna hi December ni 11, 2024-a CADC thutkhawmna a MNF kaihhruai CEM Pu Rasik Mohan Chakma sorkar phar thlak a nih atang khan niin, boruak insiam chho zelin MDC engemawzatin an Party awmna an sawn a, ZPM chuan MDC 10 nei-in kar kal ta Thawhtanni khan Governor hmu-in sorkarna an siam theih thu an hrilh a. Hemi hnu lawk, Ningani khan BJP chuan an MDC 9 leh MNF MDC pakhat thlawpna-in NDA sorkar din an tum thu an puang ve leh a. Hetianga boruak a awm lai mek hian ZPM lama awm MDC 3-in BJP an thlawp thu an puan leh tak avangin boruak hi a inlumlet leh ta a ni.