Central YLA in Rakhine State a Oil luttur an dang chhunzawm, ramchhung mite inhrek tumna an neilo tih an sawi nawn.

June 24 atanga Central Young Lai Association in dan kalha Rakhine State, Myanmar a Oil leh bungrua thawnluh thin an dan chu an la chhunzawmzel a, Central YLA hruaitute chuan an thiltih chu Sorkar pawhin a hriatpui tih sawiin, ramchhung mipuite inhrek tumna a awmlo tih an sawi.

Vawiin khan The Lawngtlai Post chuan Lawngtlai daia Police leh YLA Duty Post tlawhin, helai check post ah hian Oil phur tangkhang an awm lova, Myanmar a luttur a ngaih eichawp phur lirthei thenkhat erawh tangkhang a awm.

Central YLA hruaitute chuan an thiltih chu ramchhung mite inhrek tumna a nilo tih an sawi nawn a, Oil phur Siaha a dahtur te chu an tlangtir zel tih an sawi a, filling Station thenkhat behchhana Oil phur, a dahna tur hmuna dah lova, Myanmar ramri lam panpui an awm tawh thin vangin duty te chu an fimkhur hle niin an sawi a, mipui ta tur a ni tih hriatchiante erawh tangkhang an awm ngailo an ti.

Central YLA hruaitute chuan dan lova Rakhine state a Oil leh thildang thawnluh kawngah Sorkar in a tihtur thatakin hlen se an duh ber tih an sawi a, sorkar in a tihtur a tih chuan YLA tan rimtaka thawka chetchhuah chu thil tulloah ngaiin an tawpsan maitur thu an sawi.