Lai District Headquarters
Lawngtlai : Mizoram.
PRESS RELEASE
(No. 27/ZPM-LD/PR-24)
"Mizo mipuiin ZPM party-ah rinna an nghah nasat zia MP inthlan result hian a ti chiang a ni."
- Dr. Lorrain Lalpekliana Chinzah
Adviser to Chief Minister (Agri. & H & FW)
Dated Lawngtlai, 04th June, 2024.
Vawiin chawhnu khan ZPM Lai District Headquarters Lawngtlai office-ah, kum 2024 MP (LS) inthlana ZPM candidate Pu Richard Vanlalhmangaiha tlin lawmna leh, Pathian hnena lawmthu sawina hun hman a ni a. He huna thusawitu, Lawngtlai East MLA Dr. Lorrain Lalpekliana Chinzah, Adviser to Chief Minister ni bawk chuan, "Mizoram a cheng mipuite hian kan ram siamtha tur leh, ram hmasawnna hna thawk turin ZPM party ah rinna an nghat nasa hle tih MP result hian a ti chiang a ni." a ti.
Adviser to Chief Minister chuan, "Pu Lalduhoma kaihhruai ZPM sawrkarah mipuite kan thla a muang a. Kan ram enkawl zel tur hian ZPM party ah rinna leh beiseina sàng tak an nei a, chu an beiseina chu kan ti hlawhchham dawn lova, hma lam panin kan kal zel dawn a ni." a ti a. MP inthlan hmain, Lawngtlai West lamah ZPM boruak a hniam thu sawi bawkin - General Headquarters hruaitute leh MLA / Minister te'n theihtawp chhuaha hma an lakna zarah, Lawngtlai West ah ZPM candidate in hnehna a chan thu a sawi bawk a. LADC MDC ZPM party support tute hnenah lawmthu sawi bawkin, ZPM a thawkho turin a sawm a. ZPM party support tur leh, kan hma lawka VC election lo awm turah ZPM tan ke pen ho zel turin a sawm bawk.
Pu MC. Lalramchhana, ZPM Lai District Headquarters Lawngtlai President pawhin thusawiin, "Lawngtlai District-a ZPM thli-fim thaw ṭhin kha, tunah chuan thli-pui chak tak (cyclone) ang maiin a awm tawh a. Lawngtlai East leh Lawngtlai West ah te ZPM dinhmun a kâng chho nasa hle a, kan hma lawka VC inthlan lo awm turah pawh hnehna sàng tak kan chan ngei kan inring a ni" a ti a. Unit, Block leh District Headquarters hruaitute thawhrimna zarah tun dinhmun thleng thei kan nih thu sawi bawkin, "MP (LS) inthlana Lawngtlai East leh West a hnehna kan chan theihna chhan ber chu, kan lamah Pathian a tang tlat avang leh, party miten thawhhona ṭha leh inlungrualna ṭha tak kan neih vang a ni." a ti bawk.
ZPM MDC Pu K. Hre Kung chuan, "ZPM MP candidate Pu Richard Vanlalhmangaiha chakna chu 'landslide victory' a ni." a ti a. MP inthlan dawna LADC politics boruak inlumleh dan thlirletin, vawiina kan result hi kan hmuh phak kan ring lova. Amaherawhchu, kan ṭhian ṭha MDC te min puihna avang leh, thawhhona ṭha tak kan neih avangin ZPM in nasa takin vote kan hmuh belh a ni, a ti a. LADC ah ZPM in hma hun eng tak a neih thu sawi bawkin, Lairamah kalphung thar sawrkar ṭha leh ngialnghet a awm thuai tur thu a sawi bawk a ni.
Member of Parliament (Lok Sabha) inthlan neih zawh takah khan ZPM Lai District Headquarters Lawngtlai enkawlna hnuaia awm, MLA bial pahnih i.e 37th Lawngtlai West a/c leh 38th Lawngtlai East a/c ah hetiang hi ZPM dinhmun a ni.
Lawngtlai West :-
ZPM - 5,920
MNF - 5,207
( Diff. 713)
Lawngtlai East :-
ZPM - 6,129
MNF - 4,066
(Diff. 2063)
Lawngtlai District-a ZPM vote hmuh zat :-
• 12,049
Lawngtlai District-a ZPM chakna zat :
• 2,766
He lawmthu sawi inkhawm tawi hi Pu JH. Thangliana Chairman, MP Dist. Campaign Committee chuan kaihruaiin, Upa C. Vanlalhluna'n Pathian hnena lawmthu sawi tawngtaina a nei a. Pu H. Lalnghakzuala, Treasurer MP Dist. Camp. Commt. hnen aṭang lawmthu sawina leh report ngaihthlak niin, Pu V. Khumsanga, Western Block-I President hnen aṭang thusawi ngaihthlak a ni bawk a. Party hruaitute leh party mi engemaw zat an kalkhawm a ni.
Issued by :-
Media, IT & Publicity Dept.
ZPM Lai Dist. Hqtrs, Lawngtlai.