April ni 19, 2024-a Lok Sabha Inthlanpui buatsaiha Lawngtlai khawpui chhunga polling station hrang hranga voter-te a ṭul anga lo puibawm tura tlawmngaia inpe (volunteer) Don Bosco School, Lawngtlaia Scouts & Guides zirlaite hnena lawm thu sawina thilpek hlanna hun chu vawiin chawhma khan Lawngtlai DC Conference Hall-ah buatsaih a ni.
He hunah hian Lawngtlai District election official-te leh Don Bosco School Lawngtlaia Principal, zirtirtute leh zirlaite an tel a. District Election Officer Pu Cheemala Siva Gopal Reddy chuan Lok Sabha Inthlanpuiah kum upa leh vohbikte, damlohna avanga buaipui ngai leh voter puihbawm ngaite ṭanpui leh puibawm tura Don Bosco School Scouts & Guides te an pen chhuak chu lawmawm a tih thu sawiin, inthlan tihlawhtlingtute zinga mi an ni tih leh an inpekna chu Election Commission of India (ECI) pawhin a hlut hle tih a hrilh a. Inthlannaa an duty chu mite ṭanpuina tur a nih piah lamah anmahni ngei pawhin inthlan chungchang an zir belhna tura ruahman a nih thu sawiin, a taka an thil tawnte chu an hlawkpui ngei a beisei thu a sawi a. Zirlai kal khawmte chu mi dang tana malsawmna nih tum tlat tur te, ṭanpui ngaite ṭanpui ṭhin tur te, khawtlang nuam siam tura faina kawnga hma la tur te, mahni hnam ziarang leh nunphung zahpui lova vawng nung zel tur te leh mahni inrin tawkna nena eng kim hmachhawn tur te'n a chah a ni.
He hun hi Election Officer Pu Denny Lalchhuanawma chuan a kaihruai a. Don Bosco School Principal Fr Nelson Joseph chuan District Election Office-in inthlannaa an School Scouts & Guides leh zirlaite tana tha thawh ve theihna remchang an siamsak chu lawmawm a tih thu leh an thiltih hriatpuina puala hun buatsaih chu hlu a tih thu a sawi a. Scouts & Guides chu thil ṭha ti tura pawl din a nih angin DEO aṭanga ngenna an dawn pawh phur tak leh inhawng taka an chhan a, an tihhlawhtlin thu a sawi a ni.
Lok Sabha Inthlanpui neih zawh takah khan Don Bosco School Lawngtlaia Scouts & Guides 60 leh zirlai 20, an zavaiin zirlai 80 te chu Lawngtlai khawpui chhunga polling station 20-ah voter-te ṭanpui turin an duty a. He an hna thawh hriatpuina leh lawm thu sawi nan hian thuziak (certificate) leh no (mug) pakhat ṭheuh zirlaite hnenah hian hlan a ni.