Lai District Headquarters
Lawngtlai.
PRESS RELEASE
(No. 12/ZPM-LD/PR-24)
" Mi satliah tam tak ai chuan, mi rinawm tlemte an hlu zawk a ni. "
- MC. Lalramchhana
President
ZPM Lai Dist. Hqtrs, Lawngtlai.
Vawiin khan ZPM Office Lawngtlai ah party chhung inkhawm programme hman a ni a. He huna thusawitu, ZPM Lai District Headquarters Lawngtlai President Pu MC. Lalramchhana chuan, "Politics-a mi satliah ; ram siamthat nana policy leh thiltum mumal pawh neilo mi tam tak ai chuan, ram leh hnam hmasawnna tura policy a nghet, mi rinawm tlemte te hi an hlu zawk a ni." a ti.
ZPM Lai District Headquarters President chuan, ZPM party policy leh thiltumah in phuarkhawm a, party thuthlung a ding nghet tlat turin party mi te chu a chah a. "Ram siamthatnan leh hmasawnnan nghet takin ZPM party hmang hian hna thawk ila, he ram leh hnam hi kan dam dawn a ni." a ti bawk.
Pu K. Hre Kung, MDC pawhin thusawiin " MDC te hlawh punna Bill LADC in a lo pass tawh MNF sorkar in kum thum chhunga a tih hlawhtlin theih loh chu, ZPM Sorkar chuan thla hnih lek an Sawrkar chungin a tifel ta a, Gazzette a lo ni ta hi a láwmawm hle a ni." a ti a. "Thla hnih chauh la sawrkar ZPM party hian keini ADC te hi min hnuchhawn lova, kan hmakhua a ngai hle a ni. Mizorama sawrkar lo awm tawhte leh sawrkar kal ta te'n an la tih hlawhtlin ngaihloh, ZPM sawrkar chuan a rawn ti hlawhtling nghal a, heihi kan ram leh a chhunga mipuite tan hmasawnna duhawm tak, kan zavaia kan chhawr tangkai tur thil a ni." a ti bawk.
Vawiin party chhung inkhawm programme hi Pu J. Rohlupuia, Secretary chuan kaihruaiin, Pu JH. Lalthangliana, Vice President in hunserh a hmang a. Dt. 15th February, 2024 a chatuan ram pan ta ; ZPM Lai Dist. Hqtrs Lawngtlai Ṭhalai Secretary Pu C. Zonunsanga sunna hun hman niin, Upa C. Vanlalvena Chandmari Unit chuan tawngtaina a nei a. ZPM Lai District Headquarters Lawngtlai hruaitute leh town chhung leh pawn aṭangin Unit hruaitu mi engemaw zat an kalkhawm a ni.
Sd /-
(H. VANLALHLUNSANGA)
General Secretary
Media, IT & Publicity Department
ZPM Lai District Headquarters, Lawngtlai.
Dated Lawngtlai,19th February, 2024.