South Lungpher Students' Welfare ten Zirlai chawimawi tlakte an chawimawi.

Vawiin   khan South Lungpher Students' Welfare (SLSW) ten kum tina an lo tih thin danin an khua atanga zirlai tithate chawimawina hun leh an pawl kum-10 tlin lawmna chu FL Resort, Lungzarhtum bulah ruai nena hmang in, he hunah hian Bialtu MDC, Pu C. Lalmuanthanga chu khualliana hmang in, zirlaite chu tihtak takna nena an zirlaite bei tur leh retheihna leh harsatna chu inhneh tir tur a nih loh thu te, mahni tuina leh thiam bikna thlan thiam a, chumi kawnga theihtawpa hlawhtling tura beih a pawimawh thu te, hna a van tawh avangin zirsan ringawt leh Degree tha tak tak neih ringawt hi eizawn nana hman tlak a nih kher tawh loh thu te sawi in, mahni zirlai thiam chian leh tihtak takna nena zir erawh chuan engkawngah pawh hlawhtlinna a awm thu te, Graduate nih tawh hnuah pawh kut hnathawh leh hna hniam zawk pawh thawh hreh lo tur te, engkimah Pathian dah pawimawh hmasa ber tur te leh inrenchem a pawimawh zia te sawi in, thawkrim leh titak tak te chu Pathianin mal a sawm ngei ngei thin a ni a ti.

SLSW te hian zirlai tithate chawimawina bakah hian, a mamawh a piang te tan kum tin Aizawl Civil Hospital-ah thisen pe thin in, khawlai tihfai, Aizawl hmuna damlo a tul anga buaipui leh an members pui Kohhran dan anga inneite chawimawina te pawh an nei thin bawk.

Kumin hian Distinction chin mi-8 hnenah chawimawina hi hlan ni in, an pawl din atanga vawiin thlenin SLSW hian zirlai titha an chawimawi hi mi 150 an chuang tawh a ni.

An khuaa mi hmingthate pualin Award siam ni in, HSLC-a mark hmu sang ber hnenah Pi Tuankaii Award, HSSLC-a mark hmu sang ber hnenah Pi S. Lalrimawii Award, Graduate-a mark hmu sang ber hnenah Pu Hmungduna Chinzah Award, Post Graduate-a mark hmu sang ber hnenah Pu B.Hniarmanga Award leh Professonal lines-a mark hmu sang ber hnenah Pu B. Ngunsua Award te hlan thin a ni.