Vawiin khan Lawngtlai District Merchant Association (LDMA) hruaitute chuan LADC Sawrkar a Revenue leh Sanitation Department changtu Executive member te hmuin, sumdawnna chungchanga harsatna an tawh thinte an sawipui.
Krismas vuakvetah Lawngtlai khawpui chhungah District dang atanga thuamhnaw leh thildang zuarte tamtak an awm thin chu ngaimawhawm an tih thu te, Dawr man to tak taka luahte chuan harsatna an tawk fo tih an sawi a, hmundang atanga inzuarte hian Dawr kawt remchang laiah leh khawlai hmun remchangah te in zuar in, an thil zawrhte chu hralh zawh loh an hlauh avangin man tlawm tak tak ten an zuar thin tih an sawi a, Merchant Association hruaitute chuan heng khawlaia inpho te hnenah hian District Council in Temporary License an pe thin ni a an hriat thute sawilangin, kumin ah chuan Temporary License hi pechhuak tawh lo turin an ngen.
Pu C. Hrangthianga, Executive Member, Land Revenue & Settlement Deptt changtu leh Pu Lalropuia Chinzah, Executive Member, Sanitation Deptt changtute chuan Lawngtlai District Merchant Association hruaitute thil thlen chu an ngai pawimawh tih an sawi a, hmundang atanga Sumdawngte hnenah Temporary License an pekchhuah ngailoh thu lo sawiin, District Council leh Merchant Association te tangdun a endik nise tha an tih thu an sawi. Dawrkai te pawhin an Dawr kawtah tumah midang inpho tir lo se tha an tih thu Executive Member pahnihte chuan sawiin, Merchant Assocciation te ngenna chu lo enzui a, a tul anga hmalak anih tur thu an sawi.
Lawngtlai District Merchant Association hruaitute hi an President Pu L.Rinawma chuan a hova, sumdawnna kawnga an mahni enkawltu Department pahnih changtu Executive Member te an kawmna chuan rah thatak a chhuah ngei an beisei tih an pawl hruaitute chuan an sawi.