Lawngtlai DC atanga hmundanga sawn, Pu H.Lalhmingthanga, Lawngtlai District MJA Patron chu vawiin khan MJA ten thlahna hun DC Bungalow, Chawnhu ah an hmang.
District MJA President Pu Lalngheta Ralte chuan Pu H.Lalhmingthanga chu a hriselna lam inenkawl deuh a ngaih vanga DC atanga sawnchhuah ngai a ni chu MJA ten pawi an tih thu leh hriselna thatak a neih theih an duhsak thu a sawi a. Lawngtlaia a awmchhung reilo hle mahse, Journalist te nen thawhhona thatak an nei chu an hriatchhuahfo tur zing ami a nih thu a sawi.
Pu H.Lalhmingthanga chuan Lawngtlai District tan ruahmanna hrang hrang a lo neihte taksa hrisellohna vanga hmala theilova a awm tur chu hrehawm a tih thu sawiin, District mipui, Kohhran leh NGO ten an thawhpuina lawmthu a sawi a, Lawngtlai District mipuite an hmalam hun ah duhsakna hlanin, tangkaina a neihna apiangah Lawngtlai District tan theihtawp chhuah a inhuam thu a sawi.
Pu H.Lalhmingthanga hi Controller, Printing & Stationery hna chelhtura tih a ni a, Lawngtlai DC atan Pu Joseph H.Lalramsanga dah niin, nimin Inrinni tlai khan Pu Joseph H.Lalramsanga hian DC Lawngtlai mawhphurhna a la tan.