Kum 80 chunglam leh rualbanlo ten vote an thlak tan.

Tukin khan DC pisa tualzawl atangin Lawngtlai district chhung a voter kum 80 chhunglam leh pianphung a rualban lo, vote thlak tur a mahni Polling Station pan tur a harsatna neite tan in lam a vote thlakna hun, Home Voting nei turin Mobile Polling Team-te vailiam an ni.

He hun hi Pu Abraham Beirazi Khithie, Addl. Deputy Commissioner chuan kaihruaiin Pu HS Lalngaizuala, PwD Icon, Lawngtlai district chuan Mobile Team-te hi a vailiam a, Pi Rochuangkimi Khenglawt, PD, DRDO, Pu Chinlianmanga, SDO(C) leh Pu Hmingthanzuala, DIPRO-ten an telpui a ni.

Pu Abraham Beirazi Khithie, Addl. DC chuan India danpuiin kum 18 tling tawh, Electoral Roll-a hming inziak lut tawh phawt te chuan an aiawh thlang tur a duhthlanna chanvo an neih thu sawiin mipui rorelna tichiang lehzual turin vote thlak kan ngaih pawimawh a tul thu a sawi a. Kum 80 chunglam leh pianphung a rualban lo, vote neite uluk tak a chhinchhiah niin Vote thlak tur a Polling Station pan kawng a harsatna neite tan Election Commission of India ruahmanna angin mahni in lam a vote an thlak theih nan Home Voting hi ruahman a nih thu a sawi. Lawngtlai district-a Home Voting kalpui tur hian Mobile Polling Team pali ruahman a ni a, Addl. DC chuan vote hlutna chu a intluktlan vek angin Lawngtlai district chhung a Absentee voter-ten vote an thlak vek theih nan an mawhphurhnate tha tak a hlenchhuak turin a chah a ni.

Lawngtlai District chhung a Tuichawng Assembly Constituency ah Absentee Voter, Home Voting titur mi 13 an awm a, Lawngtlai East Assembly Constituency ah mi 79 leh Lawngtlai West Assembly Constituency ah mi 11 Home Voting titur an awm. 

Lawngtlai district pum ah mi Absentee voter 103 awmin Mobile Polling Team-ten an mahni inah an kalchilh in vote an thlak tir mek.