Lawngtlaiah Independence Day 2023 hman dan tur rel a ni

Vawiin khan Lawngtlai DC Conference Hall-ah Deputy Commissioner charge la mektu, Pu Abraham Beirazi Khithie hovin Lawngtlaia Independence Day 2023 hman dan tur rel a ni a. Sawrkar official-te, political party leh pawl hrang hrang ai awhte an tel.

Sorkar thuchhuah a tarlan a nihdanin, Chairman Pu Abraham Beirazi Khithie chuan member kal khawmte lawmna thu sawiin, Lawngtlai District-a ram ni pawimawh hman ṭhin dan tlangpui a tar lang a. Kum 2023-a Independence Day hman dan tur sawi ho niin, sports discipline ṭhenkhatin Independence Day 2023 puala inelna (tournament) buatsaih an dilna pawh thlir ho a ni.

Meeting chuan kumin Independence Day lawmna hi Central YLA Playground-ah August ni 15, 2023 (Thawhlehni) zing dar 8:30-ah hman ni se, tiin a rel a. Independence Day lawmna ceremonial parade buatsaih ṭha tih niin, ruahmanna siam turin parade sub-committee din nghal a ni.

Independence Day lawmna atana thil pawimawh hrang hrang bawhzuia hma la turin Technical Committee din a ni a. Department leh tlawmngai pawlte kovah mawhphurhna hrang hrang nghah a ni bawk.

Independence Day ni-ah hian sawrkar office, zirna in leh sawrkar quarters-ah te hnam puanzar zar vek tura tih a ni a. Lawngtlai khawpui chhunga damdawi in pathum - District Hospital Lawngtlai, Lairam Christian Medical Centre & Hospital leh Christian Hospital Lawngtlai te, chhawmdawlna in - Lairam Motherless Home te, District Jail te, Lairam Rescue Centre leh Gilead Drop-In Centre-ah te Independence Day pual ṭanpuina thilpek pek leh ni se, tih a ni.

Kumin Independence Day lawmna puala tournament buatsaih diltu sports association pahnih - Lawngtlai District Football Association leh Lawngtlai District Badminton Association te dilna chu
remtihsak a ni bawk.