Nimin khan Lawngtlai DC Conference Hall-ah Lawngtlaia ei leh in siam leh zuartute tan ei leh in thianghlim leh himna chungchang zir hona, "Sensitisation Workshop on Food Safety" buatsaih a ni.
He huna Khuallian, LADC-a Sanitation changtu Executive Member (EM) Pu Lalropuia Chinzah chuan tha taka hna thawk turin hrisel a pawimawh a, chumi tur chuan mihringin ei in thianghlim leh hrisel kan mamawh tih a sawi a. Ei in thianghlim lo leh hrisel lo chu natna leh thihna hial thlentu a nih avangin ei in siamtu, zuartu leh leitute kan fimkhur a tul a ni, a ti. Ei in siamtu kal khawmte chu anmahni dawrtute ei tur hrisel leh thianghlim hlui chu an mawhphurhna a ni tih hre reng tura chahin, "kan him tlan nan leh kan lo hrisel deuh deuh theih nan Food Safety and Standards Act, 2006 hnuaia dante hi mi tinin tha takin i zawm ang u," tiin kal khawmte chu a sawm a ni.
He zir hona hi Lawngtlai CMO, Dr LP Malsawma, Designated Officer (Food Safety) chuan a kaihruai a. Lawngtlai Additional Deputy Commissioner Pu James Miahlung, Adjucating Officer (Food Safety) chuan food safety chungchanga Lawngtlai District chhunga hma lakna report a pe a. CMO office Lawngtlaia Assistant Drug Inspector Pu P. Laltlanzova'n food safety chungchang leh Food Safety and Standards Acts & Rules-a hriat tur pawimawhte leh ei in siamtute tana hriat tur pawimawh hrang hrang a zirtir a. Zawhna leh chhanna leh sawi hona hun hman zui niin, Lawngtlai SDO (Sadar) Pi TT Beikhaizi chuan lawm thu sawiin hun a khar a ni.