Lawngtlai DC, Pu Amol Srivastava chuan Inrinni khan Lawngtlai leh Kawlchaw 'W' inkar National Highway kawngpui laih zau hna thawh mek chu a hmunah kalin a enfiah a. Hna enkawltu leh hna thawktute nen hma lak zui zel dan tur an sawi ho.
DC, Pu Amol Srivastava hi Additional DC, Pu James Miahlung leh DI&PRO Pu C. Lalhruaitluanga te'n tawiawmin, Kawlchaw 'W' thlengin kawngpui zauh hna thawh mek chu an en a. National Highway kawngpui zauh hna enkawltu National Highway Infrastructure Development Limited hotute, hna viltu Intercontinental Consultants and Technocrats Pvt. Ltd (ICT) leh hna thawktu Power Mech Projects Ltd (PMPL) hotute'n lo dawngsawngin, an thawh tawh chin dinhmun leh harsatna an neih te, an thawh chhunzawm dan tur ruahmanna te an lo hrilhfiah a. DC hian leivung paihin ram leilung, lui dung leh ramngaw a tihchhiat loh nana leivung paihna tur hmun (spoil bank) an ruahman dan leh leivung an paih dan te enfiahin, ram leilung tichhe lo thei ang ber tura ruahmanna awm sa anga paih turin hnathawktute a hrilh .
DC hian leivung paih dan a enfiah bakah hian kawngpui zauh hna thawh chungchanga hna thawktute'n harsatna an tawh hrang hrang chin fel dan tur a sawipui nghal a. Chhim lam tana kawngpui pawimawh tak a nih angin hna thawh dan tur hun bi tuk sa leh a hmelhmang ruahman sa mila a ?ha thei ang ber leh a chak thei ang bera hna thawk turin contractor-te chu a chah bawk.
NH-54 kawngpui zauh hna thawh mek hi package riatah then niin, Lawngtlai College Venga 71 RCC atanga Siaha District chhunga Zero (Maubawk) thleng hi Package-7 a ni a. NHIDCL enkawlna hnuaiah PMPL ten hna hi an thawk a. Lawngtlai District huam chinah, 71 RCC leh Kawlchaw 'W' inkarah hian leivung paihna (spoil bank) ruahman sa 5 awmin, ram neitute nena inbiak remna anga leivung chhun khahna hmun (dumping area) 8 a awm bawk. NH-54 zauh hna Package-7 hi April 2024-ah zawh tura ruahman a ni.