Nimin khan Chandmary Inpui, Lawngtlaiah MNF District Hqrs. Lawngtlai buatsaihin political training neih a ni a, kum 1986 hnu lamah Lawngtlaia MNF Party in Political Training neih lehna hmasaber niin, Resource Person Pu Lalthlengliana, MNF Vice President chuan MNF chu Mizo Nationalism-a chiang, chuta innghat tlat chu kan ni a, chuta tanga kan kal pen vaih chuan kan hnam a ral ang, a ti.
MNF Party dinchhhan leh a thiltum kan hrechiang tur a ni, tiin, Pu Laldenga leh a hoten Oct 22, 1966-a an din thu a sawi a. "Nationalism chu mahni hnama chiang, hnam rilru pu, hnam dang rahbehna hnuaia awm duh lo, mahnia ro inrel leh mahni kea dinchhuah duhna rilru pute an ni.
India awpbehna ata zalenna famkim kan neih theih nan March ni 1, 1966 khan independence a puang a. Kum 20 chhung India sorkar kan do a, hetiang political party hi Mizoramah an la awm lo. MNF atang lo chuan an awm thei leh tawh ngai lo ang, a ti.
MNF danglamna sawiin Pu Lalthlengliana chuan ram tana tha turah sorkar hmasa hmalakna kan hlamchhiah ngai lo. Congress-in thu chauha an puan district panga chu kum 1998-ah MNF sorkar-in a function-tir a. Kum 2008-a district thar pathum kan pek - Hnahthial, Sailtual leh Khawzawlte chu Congress kum 10 sorkar tihpuitlin duh loh pawh tun sorkar hian thla 8 chhungin kan tipuitling vek, a ti.
Pu Lalthleng liana chuan Hripui, ramri buai, lirnghing, raltlan leh ran pulh hri kara Pu Zoramthanga sorkar hian Congress kum 10 thawh ai khan a thawk tam zawk a, kan Chief Minister anga thil tithei leh taima hi hmun dangah an awm ka ring lo. Union Budget-ah Bamboo Link Road Rs. Vbc 100 leh Aizawl Bypass Road Rs. Vbc 500 pek kan ni a. Central budget atanga direct-a sum hmuh hi tunhmaa la awm ngai lo, a vawi khatna a ni, a ti.