Sawrkar laipuia Ministry hrang hrang 9 hnuaia mipui hamthatna tur ruahmanna hrang hrang 16-a hamthatna dawngtu -te nena inbiangbiakna atan te, he’ng scheme hrang hrangte’n khua leh tuite tana khawsak awlsamna a thlen dan hriat fiahna mai bakah, tangkai zawka mipuiin an chhawr theih dan tur rawtna awm theite hriatna atan te he Inkhawmpui hi buatsaih a ni a. Kum 2047-a India ramin zalenna a hmuh kum 100-na atana khua leh tuite hmathlir leh beiseite hriat theihna atan tih a ni bawk.
Lawngtlaia hun hman hi zing dar 9:45-ah tan niin, Additional DC Pu James Miahlung chuan a kaihruai a. Lawngtlai DC, Pu Amol Srivastava chuan inlawmna thu sawiin, sawrkar scheme hrang hrang hlawhtlinna chu beneficiary-te leh line department-te thawh rimna rah a nih thu a tar lang a, sawrkar, department leh mipui thawh hona avangin ramin hma a sawn zel dawn a ni, a ti.
He hunah hian scheme hrang hrang beneficiary leh line department hotute, VC ai awhte leh tlawmngai pawl hruaitute leh chanchinbu mite an kal khawm a. DRDA atangin Project Director Pi Marilyn Rualzakhumthangi chuan "Amrit Sarovar (tuikhuah siam) hnuaia Lawngtlai District-a hma lakna tlangpui" sawiin, SBI Lead Bank Office atangin Lead District Manager Pu Lallawmkima chuan "bank kal tlanga dawn theih hamthatna hrang hrang awmte" a sawi fiah bawk a. Department hrang hrang hnuaia scheme hrang hrang khawihtute'n scheme nihphung tlangpui tar langin, mipuite’n a nih dan tur taka an chhawr theih nana hmasawn ngaihna lai te sawiho a ni.