INFIAM LAMA TUI MI TAN
(Career Guidance)
Mizo te hi harhvang leh infiam ngaina tak kan ni a. Tun hnaiah phei chuan hma kan sawn chakin ram pum huap a hming chher pha pawh kana awm ta nual mai. Kan khawvel thang chho zelah sport hi a tui pui leh tih tak tak a luhchilh te tan chuan eizawnna tlak ani tih pawh a lang chho zel bawk a. Amah erawh chu sports lam a bachelor degree nei hi kan la tamlo in hetiang lam course pawh hi mi tamzawk in kan la hmelhriat lo niin a lang a. Chuvangin course pakhat BPESS chungchang hi tlem I han sawi zau dawn teh ang.
BPESS lam pum hi Bachelor of Physical Education and Sport Science (BPESS) tih ani a. A hriat thiam awlsam zawngin sports lama graduate course kan ti thei mai ang chu. He course hian Sports leh physical fitness lam pang a thlur bing a. Infiamna chi hrang hrang leh a kaihhnawih hriattur pawimawh zawng zawng a huam vek a tih theih awm e. Chuvangin he course hi infiamna lam tuichilh tak tak leh eizawnna atan a hmang duh te, taksa hriselna leh fitness ngaipawimawh tak tak te tan a zir chi ani . Mi nazawng tan a zir chi ani lemlo. A bik takin taksa hriselna lam a harsatna nei te tan phei chuan zir ve ngawt a fuhlo thei. Hetiang hi anih avang hian college thenkhat ah chuan azir tur te hi physical efficiency test neih hmasak tir an ni thin.
Tu te nge zir thei : Pawl 12 pass eng stream tan pawh zir theih ani a, cut off mark hi General tan 50%, Tribal tan 45% ani tlangpui. Tin, mi hrisel tha leh harhvang, taksa lama harsatna neilo leh infiam ngaina mi nih angai bawk.
A zir hun chhung: Bachelor degree dang ang tho in 3yrs degree course ani.
Mizote tan zir chi ani em: kan hriat theuh angin khawlvel ah infiamna in hma a sawn chho in hriselna lam kan dah pawimawh chho zel a. mizote ngei pawh sports ngaisang ber te zingah kan tel awm e. Gym kal leh body building tepawh kan in tih hmuh chho zel a. Infiamna hrang hrang a hming chher pha leh eizawnna atana hmang pawh kan awm ve ta nual mai. Chuvangin hetiang lam a eizawng duh leh professional player nih tum chho zel te tan he course hi zir chi tak ani a, mizote pawhin kan ril rem zawng tak niin a lang.
Eng subject te nge zir tur: He course ah hian theory leh practical a awm kawp a. Theory subject hrang hrang Sports Management, health education, English &communication leh adangte an zir bakah Practical sports hrang hrang, football, volleyball, Judo, basketball leh infiamna dang te an tuina line ang zel a zirtir thin an ni ang.
Zir zawh a hna awm thei te: Physical education instructor, Teacher, Trainer, Coach, Umpire/ Refree,Professional Player, Sport club Manager, Sports journalist, Commentator etc.
Hemi course chungchang a hriatchian duh leh zawh duh nei te tan Ph; 9774184433 ah zawh fiah theih ani e.
-C.LALHMINGHLUI, AIZAWL