Kum 2015 atanga kumtina hman thin, Green LADC Day ah vawiin khan Kaladan Multi Modal Transit Transport Project kawngpui kam bakah LADC hmun pui dang ah te thingphun beihpui thlak a ni.
LADC a Chief Executive Member, Pu V.Zirsanga chuan Green LADC Day puala inkhawm tawi buatsaih ah thusawiin, ramngaw leh nungcha chereu nasa lutuk chuan kan khawvel a tichhemek a, a siamtha tur chuan thingphun uar chu mitinin kan tihtheih awlsam leh tangkai ber a ni a ti a, thingphun chu a bultanna a ni a, enkawlpuitling tura tha thlahlova hmalak chu LADC Sorkar chuan a ngaipawimawh hle a ni a ti.
Green LADC Day hmanna puiber Lawngtlai ah chuan LADC hnuaia Department hrang hrangten chan insemin thingtiak 340 phunin, thatakin an hung nghal vek a, Sangau, Lungtian, Bualpui NG, Diltlang, Chawngte, Bungtlang South leh Vathuampui-ah pawh Green LADC Day pualin thing tiak 140 phun a ni.
Green LADC Day a thingtiak phunte hi LADC hnuaia Environment, Forest & Climate Change Department chuan an enkawlzui thin a, vawiin a phunbelh nen hian Green LADC Day ah thingtiak 2406 phun a ni tawh.
Green LADC Day puala thingtiak phunna ah hian CEM bak ah Executive Member ten an Department chan theuhte hovin an tel.
Tags
News