MADC inthlan lo awm turah hian Candidate te chuan tun thla ni 13 thleng nomination an thehlut theih dawn a, ni 18 thleng Candidate te inhnuhdawhhun hawn a ni.
Mara Autonomous District Council term kal lai hi kumin May ni 15 khian a tawp dawn a, MADC ah hian Voter sing 4 leh 2326 awmin an zinga mi sing 21960- te hi hmeichhia niin 20366- te hi mipa an ni a, Constituency 25 leh Polling Stations 81 leh Polling Booth 81 a awm a ni.
MADC ah hian Siaha East-II Constituency ah voter 2808 awmin voter tamna ber a ni a, Amohtlah Constituency ah voter 1049 awmin Constituency mal a voter tlemna ber a ni thung.
Hetih lai hian Amotlah Constituency a Riasikah Polling Station ah voter 95 awmin voter awm tlemna ber a ni a, Siaha North-I Constituency a -College Vaih-I Polling Station ah voter 1055 awmin Polling Station voter tamna ber a ni ve thung.
MADC inthlan lo awm turah hian EVM hman ani dawn ati a, nimin atangin Model Code of Condutc chu Siaha District-ah hman tan nghal ani a, hei hian Political Party te, Candidate, Minister, Member of Parliament, MLA leh inthlannaa inhnamhnawih Public Servant-te a huam dawn a ni.
Tun dinhmun ah Seat 25 awmna Mara Autonomous District Council ah hian, BJP in Member 17 neiin rorelna an kalpui mek a, MNF Party in Member 6 neiin, INC in Member 2 an nei mek bawk.