He Column ah hian, mipui tana thatur thupek chhuah thinte chu, bawhchhetu nilovin, a zawmtu nih a pawimawh thute, dan lekkawhtute man kher nghah chi a nihloh thu te, khua leh tui diktak chuan, thupek zawm chu a tihtur a nih thute kan sawi zeuh zeuh thin a.
Mipui lam pawn hma an sawnin, faina lam ah ngat phei chuan hmelthar hmuhtur a awm chho deuh reng a ni ber mai.
Hetianga mipuilam tihtur kan inhrilh fo lai hian, thupek bawhzuia, dan lekkawhtu mamawhna a len zia hi haider theih a nilovang.
Lirthei dah phallohna hmun a dahluite vaichhuah ringawt pawh hi beihfe tham a ni tih a hriat a, helama Traffic Police hmalakna pawh faktham a awm ang, hetiang deuh hian, Road Protection Squad ten hma an la a, dan bawhchhiate vaukhanna pein, pawisa chawitir te pawh an awm a, reilote ah a ngai bawkin, hmun hrang hrangah dan bawhchhia hmuhtur a awm leh a, Dan leh thupek lekkawhtuten an vilhneh lovin, chu chuan inthlahdahna, thupek ngaihpawimawhlohna a hring chhuak thin a ni.
Mipui chu zirtirngai, khuahkhirh ngai an ni a, an tana thatur a thupek chhuah thinte hi lekkawhtu lam an awm mumalloh chuan, ran khuahkhirhna dan chhuahfo a nihlaia, khawlaia Ui chhuak hmuhtur a tam reng ang hian, mipui lamin, thupek chu a hming maiah ngaiin, an palzam deuh deuh ang tih a hlawhthawnawm thin.
Dan lekkawhtur in Sorkar hian thawktu a indaihlova, heng thupek hrang hrang lekkawh a viltur hian Covid 19 do nan a State leh LADC Sorkar a thawkte an tangrual hian, hmalakna kalpui theih nise a tha phian maithei.