Electoral Roll Special Summary Revision neih mek chungchang ah vawiin khan Electoral Roll Observer, Pu K.Lalthawmmawia, Mizoram Sorkar, UD&PA leh DP&AR a Secretary chuan Lawngtlai tlawhin, Electoral Roll siammek buaipuitu leh a kaihhnawih te Meeting a neihpui.
Pu K.Lalthawmmawia chuan Electoral Roll siamna ah Mizoram chu, Official te, Political Party leh Tlawmngaipawl te thawhhona athat vangin a hmingtha thin tih sawiin, Electoral Roll thatak neitur chuan, a awmtur diktakte an awm a, awmlo turte an awmloh a nih rualin, hetiang ang thleng tur chuan tanrualna tha a pawimawh a ni a ti a, Lawngtlai District chu ramdang nen ramri thuitak intawmna a nih vangte, tun dinhmun ah phei chuan thenawmram atanga rawn lut engemawzat an awm vangin, hengmite khawtlangin lo dawnsawn chu tihtur a nih laiin, khua leh tui nihna pek erawh dan in a remtilo a ni a ti.
Electoral Roll Observer hova Meeting ah hian Lawngtlai DC, Dr Andrew H.Vanlaldika chuan Special Summary Revision neih mek a hmalakna tlangpui a sawi a, Draft Electoral Roll ah Lawngtlai District a Assembly bial pathum, Tuichawng, Lawngtlai West leh Lawngtlai East ah Vote nei 85087 an awm a, Final Electoral Roll chu nakum 2022 January 15 ah tarchhuah tur a ni.
Vawiin Meeting ah hian Electoral Roll felfai tak neih a nihtheih nan a rawtna hrang hrangte Observer ho hian sawiho ani.
