-Laltlawmlova Chinzah
Date 27.8.21 chhuna kan ram rorelna House chhung thil thleng chungchang kha Mi țhahnemngai leh mi tutute emawin inbox lama min zawh nasat a vang leh, ziak tura kei teh lul min han ngen ve takah chuan tlem ka han ziak dawn teh ang aw... (Mahse, ka thiam ber loa ka hre ber lem lo tih in hriat tel ka duh hmasa e).
LADC Constitution, Conduct of Business Rules 2010, kan hman lai berin hetiang hian Rule 21 ah a sawi a.
1. Sub rule (1) ah chuan 'District Council ah chuan Executive Member a awm ang a, chu chu Chief Executive Member in a ho ang a, Executive Members 9 executive function kalpui a nih theih nan a awm bawk tur a ni' tih a ni.
2. sub rule (2) ah chuan 'Executive Committee chu District Council legislature lian ber leh thlan tlin member ngah berin an form tur a ni' a ti leh bawk a.
2. sub rule 3 ah chuan 'Chairman emaw Dy Chairman emaw ni chungin CEM emaw E.M emaw hna an chelh thei lo ang' a ti bawk a.
Tin, Rule 24 ah hian Executive Committee paih/țhiah chungchang a rawn sawi ve thung a. Hetiangin; 1) Executive Committee chu Council ah mawhphurtu ber an ni a, Vote of No Confidence hmang chauhin paih theih an ni ang a. Rule 83 hmanga a bik taka Meeting koh a House chhunga Member present tam zawk an ni tur a ni. a ti a ni.
2) 'Executive dinglai paihthlak a nih chuan Chairman in a rang thei ang berin Governor hnenah report a pe tur a ni a, darkar 48 chhungin CEM thlanna a neih tir tur a ni ang' a ti a ni. *3) 'darkar 48 chhunga CEM a piang lo a nih chuan governor in executive thu neihna a lak sak ang' tih a ni bawk a ni.
Le khita kan rules hman lai ber kan tar lan a țang khian kan hrethiam deuh uar turah ka ngai.
Mahse, mipui zawhna ti tam bertu chu;
1) "House chhungah Opposition party te nena House Leader hi thlan ngai a ni em ni?, an thlan dan a dik lo, rules 21 nen a inkalh a lawm." kan ti chuah chuah hlawm a nih kha.
A chunga rules 21 hmang khian Exechtive Committee hi a piang tur chu a ni a. Mahse, Opposition Party ni lo, Ruling Party vekin an Executive an move takah chuan rule 24 khian chairman in CEM thar thlanna a buatsaih ang a ti tlat si a, house chhungah inthlan tur tih erawh a sawi lo a. Mahse ruling party kara khi na tak a awm ta tlat mai khian house chhunga thlan tir pawh kha a dikna chen a awm e.
A pawimawh ta lai ber chu; panel of chairman no 1 in house chhungah CEM election a buatsaih ta a. Pu V.Zirsanga te lam kha House chhungah tam zawk angin lang mahse sorkarna siam thei tur a tana majority members (MDC 13 tal) a nei si lo lai kha a ni. Council hi Member 25 awmna a ni a, executive form thei tur chuan member 13 neih ngei2 a ngai a ni. Rules ah lah khan member present tam zawkin an thlan kha a CEM ang a ti tawh si lo a. Chuvangin kan rules 21(1) hi a rawn kalh ta tlat a ni. He lai point tak move tlak tak lam ten an hmu fuh lo kha Move tute lam chan țhatna niin a langin ka hria a. A chhn chu; sawi tak ang khan member 25 awmna ah chuan a tlem berah 13 an ni tur a ni ringawt mai ni. Kha lai sawi chhuahna chang an hre lo kha insual lai ve ve si ah chuan tlawm zawk chan an channa a ni ta a ni. Rule 24 khan chairman in CEM thar darkar 48 chhungin a thlan tir ang tih ni mahse, house a member present tam zawk nei ațanga lak tur a ti lo a. Member tam ringawt kha sorkar siamna tham a ni lo a, kha kha Pu Manghmunga leh a pawlte khan an man fuh lo deuha Pu Zira kha an pa pek ta niin a lang ber e. Thil nihna diktak zawkah chuan Chairman Pu VL.Hmuaka khan sorkar siam theihna tura member 13 nei tling tumah an awm lo tih thu kha governor ah report tur a ni zawk mah a ni. Ti chuan Council chu governor hnuaia awm mai tur zawk a ni a, mahse zualko zui emaw suspend hlau tak2 tak2 an awm ve pawh a ni thei e.
2) Executive Member ten an mahni sorkar laka No Confidence Motion kha. Rual u deuh zawkin an hrechiangin ka ring a, kan rules ah hian han en vang vang ila, CEM laka No Confidence Motion chungchang pakhatmah a inziak hauh lo a. Point tin maiah Executive Committee a inti vek a. Khatia E.M ni lai mek zinga bang chuang si lo a, mahni (țhutthleng) executive move ta tlat mai kha mipui zawhna ti tamtu a ni bawk a, nge keini Lai ho hian kan uar deuh bik ka hre lem lo. Kalphungah chuan Resignation han submit zet sela chutah chuan duhtawkin executive dinglai kha perh hrep mai se.. an bansan chhan nen lam ..a mawiin a zahawm zawk maithei a ni.
3) HNAM RUN LAMIN AN MIXED-UP LOH CHUAN Kan sawi tak ang khan tun țuma Pu Zira House Leader a tana thlan a nih dan kha chu kan hrethiamin a rinawm a. Mahse an mahni team ngau ngau khan Council Majority an nei lo chiang hle tih a hriat a, a ni pawn a haiin ka ring lo, chuvangin sorkar kalpui thei a ni lo. Mahse... an Move takte lam nena an hotu ten an thawi dama nihna leh chanvo pawh sem sem dam dam an tih chuan a nghet ve peh thlup ang a, chuti a nih loh chuan a la buai hle ang. Session hmasa berah mualpho taka tla ve thei a ni. Chuvangin kei chuan a move tla tute lam duhdan vekin thil a kal ka ring lo a, a hreh lo a nih phei chuan Pu Manghmunga pawh MNF President ni tawh, CEM leh Chairman ni tawh a ni a, an rawn Chairman tir thut lo ang tih a sawi thei loh e. Chutih rual erawh chuan Pu V.Zirsanga hi Politics tawnhriat ngah tak, zirna lamah pawh mithiam a ni bawk a, a sorkar erawh a hum thei turah ngai ila.
4) CONGRESS VS MNF In lo chik ve ngai em? A tlangpuiin heng party 2 ah hian MNF hian Lai ADC chhunga MNF Party te hi chuti teh chiamin an ngaihvenin, an uk-sak lem lo niin a lang. Tun țum thilah pawh khan an Leader kha duhlona a na hle tih an hre tho si a, Party hotute hmel hmuh emaw... an MDC te koh pheia siamrem tumna a awm lemin a lang lo. A tawpah party na takin a keh phah ta a, a pawi ta hle a ni. Chu chu kan ram pawhin a tuar țhin.
In zawhna tur ka han sawi law law ang e. Kum 2016 khan Pu VL Hmuaka kha Congress MDC zingah duhkhawp lohna a len em a, mahni party pui kan Leader lehnghal, mualpho taka House chhunga paihtlak kha dikin kan hre lo a. Kan hotute hnenah kan thawhpui theih tawh loh thu kan hrilh a, Office holder engemaw zatin CEM hnenah banna kan theh lut ta a ni. Chutiang chuan kan hotute khan min ko khawm ta a, a tawpah chuan min chalrem ta a nih kha. Amaherawhchu, hetianga duhlohna inlantir hi party hian a ruk takin a chhungah hliam a awm țhin erawh tuam dam a har hle. Tun țuma MNF Party keh na tak pawh hi bel keh phuarkhawm an sawi ang chauh an ni thei a ni.
A tawp berah chuan Pu Zira hian sorkarna kalpui tur chuan MDC 11 chauh khan awmzia a nei loa, a dinhmun a derthawng hle a, țan a lak fat fat a ngai a ni ber e.