Lawngtlai khawpui ah, Hri chu mipui ah a darh nasa viau tawh ang tih ngaihruat theihin a awm mek a, a darh dan chiah hi, a nawlpui a test neih a nih ngawtloh chuan hriatfuh hleihtheih pawh a ni awmlove.
Test zingah inkhunghranglai nilo, mahni inringhlel, hri an kai leh kailoh enfiah zingah Hrikai hmuhchhuah an tam thin hian, hripui hian minluhchilh thuk viau tawh tih erawh a tichiang viau thung.
Engatinge Hrikai pawh kan awmhma khan kan hlau in kan inkhuahkhirh tha viau a, tunah mipuiah hri a darh ve leh a, kan inchhuah zalen tak mai le, tih hi zawhna awmthei a ni.
Kan hriat theuh angin Mizoram hi State rethei a ni a, District anga teh pawn Lawngtlai District hi a hnufual zingah a tel pha hial ang. Hetiang dinhmun atang hian, englaipawha inkharkhip reng theih a nilova, kan inkharkhip hian hridarhtur a dangchat lemlo ni a a lantheihna liantak chu, Self Test zingah Positive an tam thin hian a tichiang in a hriat a ni.
Hripui karah, inkhuahkhirhna thlahdul chhoh a nih tak si ah chuan, mipui lam pawimawhna a zualin, hrilaka inveng chunga chet a ngaihzia hriat a hun a, inkharkhip rengturin kan District dinhmunin a tlinlova, inkharkhip hian hridarhtur a veng tak taklo bawk si, tunah chuan ramchangkang zawkte tihdan zulzuiin, mipui lamin fimkhur takin kan zalenna hi kan hman a pawimawh a, Hripui kara chhuah zalen ngam leh zalen tlak kan nih leh nihloh chu reilote ah a lang turah ngai ang.