DC chuan Lawngtlai DC office tui man chu online hmanga pein he online water tax payment system hi a hawng a. Tunlaiah sawrkar, pawl leh mimal chet velna hrang hrangah information technology thiamna hman tangkai kan intihhmuh zel a, a awlsamin, hun leh tha a heh lo va, hmasawnna duhawm tak a ni tih a sawi a. COVID-19 hri leng karah phei chuan, bill pe tura thui tak intlar a, mi dang nena inhnaih chilha hri inkai chhawn palh theih laka mipuite vengtu tha tak a ni dawn tih sawiin, Lawngtlai mipuite chuan tangkai taka hman tum tur leh, la hmang thiam chiah rih lote pawhin thiam tuma zir turin a chah a. Bul tan tir chauh a nih avangin fuh tawk lo leh tisual awm theiah mipui leh department lam pawh zawldawh taka indawr tawn thin turin a chah.
He hun hi PHED Lawngtlai WATSAN Division-a Executive Engineer Er Netralal Jaisi chuan a kaihruai a. He online water tax payment system hi nikum kum tawp lam atanga an buaipui tan thu leh, meter reader-te pawh training pek fel vek an nih tawh thu sawiin, mipuite'n tangkai taka an hman theih a beisei thu a sawi a. Sub-Divisional Officer Er T. Mangliandinga'n lawm thu a sawi bawk.
He hunah hian PHED-a thawktute bakah, Lawngtlaia thu thar la khawmtute an kal khawm a ni.
Tui man hi PHED online payment portal (www.p hedmizoram.in / bill payment.php) -ah emaw, BHIM, Paytm, PhonePe leh Google Pay apps hmang te'n emaw pek theih a ni a. Online-a tui man pek dawn chuan consumer account number (tui bill-a inziak thin) nen thlun zawm hmasak a ngai a. Portal atanga pek hian convenience fee tlem te chawi belh ngai awmin, apps dang atang chuan chawi belh ngai a awm lo