Chief Minister Pu Zoramthanga chu nimin khan Mizoram Kohhran Hruaitute Committee (MKHC) hruaituten a pisa ah kawmin, COVID-19 hri leng thawh hnihna laka mipui an him zawk nan leh, he hri leng nasa taka darh zau zel chu chhut chah a nih theih nan sawrkarin inkaihhruaina khauh zawk kalpui se tiin an ngen.
MKHC hruaitute chuan Mizorama COVID-19 hri kai an pung chho zel en hian hun reilo te chu tun aia khauh zawkin sawrkar a kal a ngai tawh ni a an hriat thu an hrilh a. Thingtlang hmun thenkhat, hrileng boruak a ziaawm zawk naah chuan thlai chi thlak hunlai a nih avangin inthlahdul a rem zawk thei a, khawpui hrang hrangah case a pun chhoh zel naah te chuan hun engemaw chen chhung chu khauh taka inkhuahkhirhna hi kalpui tul niin an hria tih an sawi a. chhuanchham leh ei harsa an awm loh nan kohhran ten theihtawp chhuah an inhuam thu an sawi bawk.
Chief Minister chuan an rawtna chu thaa a hriat thu leh a tawmpui thu a chhang in, an rawtna hrang hrangte chu sawrkarin a ngaihtuah zui tura thehlut turin a lo ngen a. Heng hun khirh takah hian khawsak harsa zawkte'n nitin mamawh lama an mangan lohna turin sawrkar, kohhran leh tlawmngai pawl te an tan ho a pawimawh thu sawiin, kohhran hotuten hemi kawnga an inhuamna chu lawmawm a tih thu a sawi bawk.