Health Minister Dr R.Lalthanglianan Mizorama Covid-19 case pun chak dan kalhmang enin he hri hian khawtlangah bu a khuar tawh tih a lang a, State chhung khawilai mah a him bik e tia sawi ngam tur a awm ta lo, a ti.
Health Minister hian mipui hnenah thuchah sawiin, Mizoram dinhmun a khirh hle tawh a, damdawi leh a hmanrua in a zo lovang tih a hlauhawm tawh a ti a, COVID-19 hripui laka Mizoram dinhmunin ziaawm lam a pan theihloh avangin kar hnih zet inkhuahkhirh hnuah a hma aia khauh lehzuala kar khat dang kal leh a ngai dawn a, hei hi kil tin atanga teh hnu a mipui zawh tawk leh thatpui tlan theih tura rual thei tur ang bera ruahman a ni tih hriain mipuiten zawm vek thei se a ti a ni.
Health Minister chuan COVID-19 dona hmanraw hrang hrang leh damdawite a vâng tawh tih a sawi a, COVID-19 positive te enkawlna atana damdawi hman lar ber Remdisivir pawh a hma anga duh duha lei tur a awm tawh lo tih sawiin tun dinhmunah VLTF leh LLTF te bâkah Police duty te leh Medical health worker, te an la tang mar thei chu lawmawm takzet a ti a, mipuiten tawiawm zel turin a chah bawk.
Minister chuan COVID19 thawh hnihna hmachhawn mek chu a aia nasa a beih a ngaih thu sawiin mipuite a hma aia fimkhur zual turin a chah.