Mizoramah Covid 19 hrilengin ziaawm lam a pan zel avangin sorkar chuan zan Pathian biak inkhawm leh Biak ina zai a remti a, karkhat chhungin zan hnih inkhawm remtih a ni.
Health Minister Dr. R. Lalthangliana hovin nimin khan sorkar thuneitute bakah mithiam bikte, tlawmngai pawl leh kohhran hruaitute Aizawla thukhawm chuan hri leng dinhmun an thlirho a, hri leng boruakin ziaawm lam a pan zel nia a lan avangin kar khatah zan hnih Pathian biak inkhawm neih tawh ni se tiin an rel a, hei bakah hian Biak Ina Pathian faka zaiho pawh phal tawh nise an ti bawk.
Inkhawm hun siam belh chungchanga mipuite zawm tur inkaihhruaina chu Disaster Manangement and Rehabilitation Department in a tichhuak dawn a, chhiatni thatni a inkaihhruaina ennawn ngai pawh State Executive Committee on State Disaster Management kutah dah a ni.
Hei bakah hian Zoram Medical College (ZMC) chu karleh thawhtanni March ni 15 atangin COVID-19 veite bakah COVID-19 vei ni kher lo, damlo dangte tan in admit theih a nih tur thu tarlan a ni a, COVID-19 veite awmna ward leh a luhka chu a hran vek a nih avangin damlo dangte tan a him thu tarlan a ni bawk a, tun dinhmunah Covid 19 enkawlna hmanrua indaih lohna a awm lo tih tarlan a ni bawk.