Inrinni, March 6 khan Dr.R.Lalthangliana, Minister Commerce & Industry Department chuan India leh Myanmar insumdawn tawnna hmunpui tur Lawngtlai District a Zochach huah bul a Zorinpui a tlawh.
Dr.R.Lalthangliana chuan, India sorkar leh MNF inremna an siam, memorendum of understanding a nih thu sawiin, bawhzuina kal zel a ni a. international boarder hrang hrang ah te insumdawn tawnna neih hi tul kan ti a. Chuvang chuan MNF ten sorkar-na kan siam hmasak Kum 1998-2008 inkar khan tuna kan Chief Minister Pu Zoramthanga kaihhruaina hnuaiah khan Trade centre te hi a rang thei ang bera kalpui tur a tih a ni a. Kan hun hmasa khan Zokhawthar te kha din hman a ni a, tuna hian Kawrpuichhuah lam pawh kawng laih a, blacktop niin double lane aia lian mah a siam chhoh mek a ni a ti a, India sorkar hotu lian te pawn Kum 2020 December thla khan a hmunah an tawh a ni a, Kum 2023 August thla hi chuan Kawrpuichhuah border trade hi hman theih tura peih hman an beisei a ni a ti.
Dr.R.Lalthangliana chuan, Zorinpui a Trade Centre din nan Lai Autonomous District Council hruaitute'n phal takin ram Sq.mtr 1,13,850 an pe chu lawmawm a tih thu a sawi a. Ram chungchang ah harsatna an nei lova, hna pawh chak zawkin an thawk thei tawh dawn a ni ati. A hlawkna tel a, chhawr ber tur chu Lai District mipuite an ni a, ram mipuite pawhin an hlut thiam a ngai hle a ni, a ti a. Dr R.Lalthangliana hian Myanmar ram lama kawng laih mek chu Kilometer 4 zet a thui chu an tlawh bawk a ni.
LADC Executive Member Pu Hre Kung i/c Revenue Department in land lesse hi Minister hnenah a hlan.