LADC a Member of District Council thlantharte chu nimin khan rinawmna thu tiamtir a lakluh an ni a, Protem Chairman atan Pu Lallawmsanga Apetow chu DC in a lalut a, CEM atan Council Veng bialtu MDC, Pu Mang hmunga Chinzah lakluh nghal a ni bawk. December ni 4 a LADC inthlanpui neih a MDC atana thlantlinte chu nimin khan LADC Secretariat tual a an puala inkhawm buatsaih ah, Protem Chairman atan a ruat Pu Lallawmsanga Apetow chuan rinawmna thu tiamtirin a lalut a, MDC atana thlanthar 25 te chu an vain lakluh vek an ni.
Hemi hnu hian MNF Legislature Party ten an hruaitu atana an thlan, Lawngtlai Council Veng bialtu MDC, Pu Manghmunga Chinzah chu Lawngtlai DC, Dr. Andrew H. Vanlaldika chuan Chief Executive Member atan rinawmna thu tiamtirin a lalut a, CEM thar chuan LADC Sorkar thar chu langtlang sorkar a nihtur thu sawiin, Village Council inthlanna ah District Council thuneihna laksak an ni chu siamthat tum a hmalak a nihtur thu CEM thar chuan sawiin, LADC kalphung pawh ngun taka ennawn a ni ang a ti a, ram mipui leh LADC hnuai a thawktute chu, ram in hmasawnna awmzenei a neih theih nan thawhpui atan a sawm nghal bawk.
CEM thar Pu Manghmunga Chinzah hi LADC a Politician senior niin, MDC atan vawi 7 zet thlantlin a lo ni tawh a, CEM thar hian nimin khan a Office a luah nghal a ni.
Lawngtlai East bialtu MLA, Pu H.Biakzaua pawhin thusawiin, LADC inthlanpui neih zawh tak ah MNF Candidate 20 lai mai thlantlin an ni chu lawmawm a tih thu sawiin, LADC Sorkar thar chu State sorkar nen pheikhai rualtaka a kal a tul a tih thu sawiin, LADC Sorkar chu mipuite innghahna ber a ni a, Party ang te, chi leh chi ang zawng ten a kal a remlova, Sorkar thar chu huapzo sorkar a nih a pawimawh a ni a ti.