Hospital fai leh ṭha intihsiakna (Kayakalp Award) 2019-2020 result chu nimin khan puan niin, a ṭum hnih nan District Hospital Lawngtlai chuan pakhatna lawmman a dawng.
Kayakalp 2018-2019-ah khan District Hospital Lawngtlai hian District Hospital zingah pakhatna dinhmun a hauh bakah, damdawi in mawi ber lawmman, "Most Beautiful Award" a hui tel bawk a. Tun ṭumah hian pakhatna dinhmun a humhim rualin, special award pahnih zinga pakhat zawk, damlote tana damdawi in pan nuam leh enkawlna pe ṭha lawmman, "Mera Aspataal Award" chu Mamit DH nen an indawn ṭawm leh a ni.
Community Health Centre (CHC) zingah pathumna chinah inhlang kai zo chiah lo mah se, Chawngte CHC chuan Commendation Award an dawng a. Hei bakah hian, special award, hmasawn nasa ber lawmman, "Most Improved Award" an dawng bawk.
Lawngtlai District chhunga Primary Health Centre (PHC) zingah Bungtlang 'S' PHC chuan lawmman pakhatna dawngin, Sangau PHC chu pahnihna an ni a, Bualpui PHC leh South Lungpher PHC chu pathumna an ni.