LADC inthlanpui neihtur huntur a hnai viau tawh a, Campaign in a vawrtawp a thleng chho mek a, Lawngtlai DC chuan December ni 1 atanga ni 5 thleng Lawngtlai ah Partial Lockdown a puang
LADC Inthlanpui neihtur ah December ni 4 khian mipuiten vote an thlak dawn a, Bial 25 awmna LADC ah hian hrileng vangin pawnlam ah Campaign boruak hriattur a awm mumalloh laiin, Candidate leh anmahni puitu te chuan campaign hi an beingawrh chho viau tawh a, mi in ah lut a, an mahni vote tur a sawm chu campaign hmanraw langsar ber a nih mek laiin, hrileng vangin chhungkaw engemawzat chuan inleng neih an duhloh vangte, Campaigner te pawn Intin a luh chu an hreh bawk vangin, Telephone leh Social Media lam pawh tumdang ai a nasa in Election Campaign nan hian hman a ni.
Inthlanpui hnai tawh tak ah, Lawngtlai ah hripui kai hmuhchhuah belh zel a nih vangin, hri hi mipui ah a darh loh nan te, hrikai te hnuchhui a awlsam zawk nan te Lawngtlai District Level Task Force thukhawm chuan December ni 1 atangin Lawngtlai ah Partial Lockdown puan nise tiin a rel a, Partial Lockdown hi December ni 5 thlenga awhtur niin, Lawngtlai DC, District Level Task Force Chairman, Dr.Andrew H.Vanlaldika chuan nimin khan Lawngtlai khawpui chhung Partial Lockdown a puan a nih thu hi hriattirna tichhuakin, inkaihhruaina tur pawh tihchhuah nghal a ni.